भांगरभूंय | प्रतिनिधी
पणजी : देशांतल्या विंगड विंगड राज्यांनी स्मार्ट वीज मिटराक विरोध जाता. हे विशीं हेर राज्यांतल्या कांय न्यायालयांनी अशे मिटर बसोवचे पयलीं गिरायकांची परवानगी घेवपाचे आदेश दिल्यात. गोंयूय गिरायकांचे पुर्वपरवानगेनूच स्मार्ट मिटर बसोवचे, अशी मागणी एल्वीस गोम्स हांणी केली. बुधवारा हे विशीं सिटीझन्स फॉर डेमोक्रिसी हे संघटणे वतीन खात्याचे मुखेल अभियंता स्टीफन फर्नांडीस हांकां निवेदन दिलें. ह्या वेळार अमर गांवकार आनी हेर हाजीर आशिल्ले.
गोम्स हांणी, गोंयांत स्मार्ट मिटर बसोवपा खातीर आमोच विरोध ना. मात कांय दुबाव आसात ताची जाप आमकां मेळपाक जाय. सरकार भाजप शासीत राज्यांत बळयां स्मार्ट वीज मीटर बसयता.
महाराष्ट्र, गुजरातांत अशे मिटर बसोवपाक विरोध जाता.
हे विशीं कांय न्यायालयांनी स्मार्ट मिटर बसोवपाक स्थगिती दिल्या. अशा वेळार गोंय सरकारान घाईन स्मार्ट वीज मिटर बसोवनचे न्हय. गिरायकांनी परवानगी दिल्यारूच अशे मिटर बसोवचे.
खात्यान ह्या मिटराविशींची म्हायती लोकांक दिवप गरजेचें.
तांणी म्हणलें, स्मार्ट मिटर प्रणालींतल्यान लोकांचो वीज वापराचो डेटा एकठांय करले. एखादें कुटूंब भायल्या गांवांत गेल्यार त्या घरांत कोणूच ना हें समजतलें. ही म्हायती आनीक कोणायच्याय हाताक लागल्यार तें धोको निर्माण करपी थारपाक शकता. हाका लागून स्मार्ट मिटर बसयतना गिरायकांचें गुपीत धोक्यांत येवचें ना हाची काळजी घेवप गरजेचें. हाची जापसालदारकी खात्यान घेवची. स्मार्ट मिटरा विशीं सध्या शिक्षण खात्या वतीन विद्यार्थ्यांमदीं जागृती करतात. मात ताचे पयलीं पालकांक, सामान्य गिरायकांक हाची म्हायती दिवपाक जाय.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
