भांगरभूंय | प्रतिनिधी
युरी आलेमाव, विजय सरदेसायाची मागणी
पणजी : आमदार विरेश बोरकार हांणी मतदारसंघाच्या प्रस्नाक लागून आंदोलन सरकारी खात्या भायर सुरू केल्लें. अधिवेशनाचे समन्स जारी जाले उपरांत ताका ओडून भायर काडपी पुलिसांचेर निलंबनाची कारवाय जावपाक जाय. पुलिसांची बदली पुराय थारना, अशें कॉंग्रेस विधीमंडळ फुडारी युरी आलेमाव हांणी म्हणलां. आमदार विजय सरदेसाय हांणी लेगीत पुलिसांच्या निलंबनाची मागणी केली.
मुख्यमंत्र्यांकडेन गृह खात्याची जापसालदारी आशिल्ल्यान विरेशाक पोलिसांकडून मेळिल्ल्या वर्तणुकेक मुख्यमंत्री जापसालदार थारतात. कामकाज सल्लागार समितीचे बसकेंत ह्या विशयाचेर चर्चा जाली. सभापती हे कस्टोडियन आशिल्ल्यान आमदारांचे सुरक्षेची जापसालदारी तांणी घेवपाक जाय. विरोधीच न्हय जाल्यार सत्ताधारी आमदारांक लेगीत अशी वागणूक मेळिल्ली जाल्यार हांव हीच मागणी करपाचों, अशें युरी आलेमाव हांणी सांगलें.
आमदार विरेश बोरकार हांकां पुलिसां कडल्यान जी वागणूक मेळ्ळी ती अयोग्य आशिल्ली. पुलीसांचेर कारवाय करपाची मागणी कामकाज सल्लागार समितीचे बसकेंत आमी केल्या.
चर्चेंतल्यान प्रस्न सुटावो करपाचो येत्न करचो : सभापती
आमदार विरेश बोरकार हांची हांवे आझाद मैदानाचेर भेट घेतली. कामकाज सल्लागार समितीच्या बसकेक लेगीत ते हाजीर आशिल्ले. सभापती म्हूण जे अधिकार आसा, ते प्रमाण हांव कारवाय करतलों. चर्चेंतल्यान बरेच प्रस्न सुटावे जावपाक शकतात. उपोशणा परस चर्चा करची, असो सल्लो हांवें दिल्ल्याचें सभापती गणेश गांवकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
