भांगरभूंय | प्रतिनिधी
पणजी: नगरनियोजन कायद्याचें कलम ‘३९ ए’ रद्द करपाचे मागणे खातीर सुरू आशिल्लें आंदोलन आतां निर्णायक वाटेर पावलां. सांतआंद्रें मतदारसंघांतले ह्या कलमा खाला मंजूर केल्ले सगले जमीन रूपांतराचे प्रस्ताव स्थगीत दवरपाक सरकार तयार आशिल्ल्यान ते विशींचें अधिकृत पत्रूय तयार केलां. ही पुराय प्रक्रिया पुराय जावचे खातीर उण्यात उणे आठ दीस लागतले, अशी म्हायती मुख्यमंत्री डॉ. प्रमोद सावंत हांणी नगरनियोजन मंत्री विश्वजीत राणे हांचे कडेन जाल्ले उच्चस्तरीय बसके उपरांत बुधवारा रातीं देडांक पत्रकारांक दिली. मात, फकत आश्वासनाचेर समाधान मानिनातना, हें कलम जो मेरेन पुरायेन रद्द जायना तो मेरेन आझाद मैदानाचेर आमरण उपोशण चालूच दवरपाचो पवित्रो रिव्होल्युशनरी गोवन्सचे आमदार वीरेश बोरकार हांणी घेतला.
ताचे पयलीं मंगळारा रातीं उसरां डॉ. सावंत स्वता आझाद मैदानार वचून उपोशणाक बशिल्ले आमदार बोरकार हांकां वचून मेळ्ळे. ह्या वेळार मुख्यमंत्र्यांनी लोकशायेचो आदर राखीत बोरकार हांकां उपोशण फाटीं घेवपाचो उलो मारलो. कलम ‘३९ ए’ रद्द करप वा तांतल्या सुधारणां विशींच्यो मागण्यो विधानसभा अधिवेशनांत मांडच्यो, थंय ह्या विशयाचेर सविस्तर चर्चा करून मार्ग काडपाक मेळटलो, असे मत मुख्यमंत्र्यांनी उक्तायलें. मात, फकत चर्चेन प्रस्न सुटचे ना, अशें सांगीत आंदोलकांनी आपल्या मागण्यांचेर ठाम रावपाचो निर्णय घेतला. हे भेटी उपरांत कॉंग्रेसीचें विधिमंडळ फुडारी युरी आलेमाव, आम आदमी पार्टीचे आमदार व्हेंझी व्हिएगस आनी आरजीचे मुखेली मनोज परब हांचे मदीं सविस्तर चर्चा जाली. हे चर्चे उपरांत जो मेरेन ठोस कृती जायना तो मेरेन फाटीं सरचे ना हें निश्चीत केलें.
आमदार विरेश बोरकार हांणी सरकाराच्या प्रस्तावाचेर आपली भुमिका स्पश्ट करतना सामक्यो खर मागण्यो मांडल्यात. तांच्या मतान, नगरनियोजन कायद्याचे कलम ‘३९ ए’ रद्द करपाचो निर्णय फकत चर्चे पुरतो मर्यादीत उरनासतना मंत्रिमंडळाचे बसकेंत अधिकृतपणान घेवपाक जाय. ह्या कलमा खाला आतां मेरेन जे प्रस्ताव मंजूर जाल्यात, ते बेगोबेग रद्द करतले, अशें लेखी प्रतिज्ञापत्र राज्याच्या एडव्होकेट जनरलानी न्यायालयांत सादर करचें, अशी तांची मुखेल मागणी आसा. उपरांत सरकारान विशेश दुरुस्ती विधेयक हाडून हें कलम कायमचें हद्दपार करचें, अशी आंदोलकांची मागणी आसा. हाचे भायर, नगरनियोजन कार्यालयांतल्यान शातिकायेन आंदोलन करपी आंदोलकांक बळाचो वापर करून भायर काडपी पुलीस अधिकार्यांचेर खर कारवाय करपाची मागणीय बोरकार हांणी लावन धरली. विशेश म्हळ्यार सांत आंद्रें मतदारसंघांतल्या जमीन रूपांतरणाचे जे चार वादग्रस्त प्रस्ताव मंजूर जाल्यात, ते बेगोबेग रद्द करपा विशीं सरकारा कडेन स्पश्टीकरण मागलां.
परिस्थितीची खरसाण वळखून नगरनियोजन मंत्री विश्वजीत राणे हांणी मुखेल नगरनियोजकां सयत मुख्यमंत्री डॉ. प्रमोद सावंत हांच्या आल्तिनो हांगच्या घरा धांव घेतली आनी रातीं उसरां मेरेन ह्या विशयाचेर चर्चा केली. हे बसकेंत सांत आंद्रेंतल्या प्रस्तावांक स्थगिती दिवपाचे सहमती जाल्ल्यान ते विशिंचें पत्रूय तयार केलां. बुधवारा जावपी मंत्रिमंडळ बसकेंत ह्या विशयाचेर म्हत्वाची घोशणा जावपाची शक्यताय उक्तायतात. मात, आंदोलकांनी स्पश्ट केलां, जो मेरेन हें काळें कलम कायद्याच्या पुस्तकांतल्यान पुशिना आनी सांत आंद्रेंतले जमिनीचें रूपांतरण थारना, तो मेरेन आझाद मैदानावेल्या संघर्शाची ही धग कायम उरतली. विरोधी पक्षांनी आनी विवीध समाजीक संघटनांनी ह्या आंदोलनाक फाटबळ दिल्ल्यान सरकारावेलें चेंपण बरेंच वाडलां, आतां पुराय राज्याचें लक्ष मंत्रिमंडळाच्या निर्णया कडेन आनी फुडल्या आठ दिसांचे प्रक्रिये कडेन लागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
