भांगरभूंय | प्रतिनिधी
पणजी: चोर्ला घांटार आयज सकाळीं एक भिरांकूळ अपघात जालो. हो प्लायवूड व्हरपी ट्रक कर्नाटकाच्यान गोंयांत येतालो. चोर्ला घांटावेल्या वायल्डरनेस्ट हॉटेला लागसारच्या एका धोको निर्माण करपी वोल्तार पावतांच चालकाचो ताबो सुटिल्ल्यान ट्रक सरळ देंगणांत कोसळ्ळो. ह्या अपघातांत ट्रका पोंदा चिड्डून एकल्याक जाग्यारूच मरण आयलें. जाल्यार आनीक एकलो गंभीर जखमी जालो. ह्या अपघातांत ट्रकाचो पुरायेन खिळखिळो जालो.
अपघाताची म्हायती मेळटांच थळावे पुलीस, ऍम्बुलन्स आनी उजो पालोवपी दळाचे जवान रोखडेच घडणुके सुवातेर पावले. देंगणांत कोसळिल्ल्या ट्रका पोंदा आडकल्ली कूड भायर काडपा खातीर प्रशासनाक क्रेनची मजत घेवची पडली. जखमी मनशाक बेगोबेग भायर काडून उपचारा खातीर वाळपय भलायकी केंद्रांत दाखल केलो. ताची भलायकी चिंता करपा सारकी आशिल्ल्याचें समजता.
मुळाव्या अंदाजा प्रमाण, हो स्वयंअपघात आशिल्ल्याची शक्यताय उक्तायल्या. चोर्ला घांटावेल्या वोल्तार चालकाचो ताबो सुटून ही घडणूक घडिल्ल्याचें म्हणटात, पुलीस हे विशीं आनीक तपास करतात. ह्या अपघाताक लागून घाटांतली येरादारी कांय काळ विस्कळीत जाल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
