भांगरभूंय | प्रतिनिधी
आमदार राजेश फळदेसाय हांच्या विरोधाचेर उक्तायली निरशेवणी
दिवचल: नार्व्यां प्रस्तावीत गंगा घांट आरती प्रकल्पाक थळाव्या नागरिकांनी जाहीर तेंको उक्तायलो. कुमारजुंवें मतदारसंघाचे आमदार राजेश फळदेसाय हांच्या विरोधाचेर खर निरशेवणी उक्तायली. हे फाटभुंयेर आयोजीत बसकेंत ग्रामस्थांनी आपली भुमिका स्पश्ट केली.
ह्या वेळार भाजपा अध्यक्ष संदेश पार्सेकार, विश्वास चोडणकार, संदीप पार्सेकार, सरपंच तुकाराम गावडे तशेंच हेर ग्रामस्थ व्हड संख्येन हाजीर आशिल्ले. सगल्यांनी एकवटान सांगलें की गांवच्या विकासा खातीर म्हत्वपूर्ण थारपी ह्या प्रकल्पाक फक्त मसंडभुंयेच्या कारणा वेल्यान विरोध करप योग्य न्हय.
इतिहासीक परंपरा आनी धर्मीक म्हत्व अधोरेखीत ग्रामस्थांनी नार्वें गांवच्या इतिहासीक आनी धर्मीक फाटभुंयेचो उल्लेख करून छत्रपती शिवाजी महाराज आनी संभाजी महाराज हांचे पावन स्मृतींचो विस्वास चोडणकार हांणी उल्लेख केलो. तांच्या पद स्पर्शान पावन जाल्ले हे भुंयेक विशेश इतिहासीक म्हत्व आशिल्ल्याचें तांणी सांगलें.
तशेंच हांगा दरवर्सा व्हड उमेदीन गोकुळाश्टम मनयतात. पंचगंगा न्हंयेच्या संगमाक लागून ह्या वाठाराक धर्मीक नदरेन विशेश म्हत्व फावो जालां. ताका लागून गंगा घांट आरती प्रकल्प रोबोवप ही गांवच्या विकासा खातीर आनी पर्यटनाचे नदरेन म्हत्वाची गजाल आशिल्ल्याचें मत तांणी उक्तायलें.
भायलो कोणूय येवन आमच्या गांवांतल्या विकास प्रकल्पांक विरोध करचो न्हय अशी खर शिटकावणी नार्वेंच्या लोकांनी दिली. विकासकामांक राजकी स्वरूप दितासतना संवादांतल्यान मार्ग काडचो अशी मागणी संदेश पार्सेकार, संदीप पार्सेकार, तुकाराम गावडे आनी हाजीर आशिल्ल्या ग्रामस्थांनी केली.
मुख्यमंत्री डॉ. प्रमोद सावंत, पर्यटन मंत्री रोहन खंवटे आनी आमदार प्रेमेंद्र शेट हांणी गंगा आरती घांट हो प्रकल्प आंखून कामूय सुरू केलां. ताका कोणेच विरोध करचो न्हय अशी भुमिका थळाव्या लोकांनी घेतली.
मसंडभुंयेच्या मुद्द्या वेल्यान विरोध करप चुकीचें
सद्या जे सुवातेर प्रकल्प येतलो थंय आशिल्ली मसंडभूंय कुमारजुंवें मतदारसंघांतल्या दुसऱ्या वाठारांतले नागरीक वापरतात अशी म्हायती संदीप आनी संदेश पार्सेकार आनी ग्रामस्थांनी दिली. फक्त मसंडभुंयेचो मुद्दो मुखार करून पुराय प्रकल्पाक विरोध करप चुकीचें आसा अशें मत विस्वास चोडणकार हांणी उक्तायलें. संबंदीत मसंडभुंयेची पर्यायी वेवस्था आमदार राजेश फळदेसाय हांणी आपल्या मतदारसंघांत करची अशी सुचोवणीय तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
