भांगरभूंय | प्रतिनिधी
पद्वी उपरांत कितें करप? हो प्रस्न आसपाक जायना
पणजी : स्टार्ट अप धोरण, शिक्षणीक सुविदा आनी विवीध उपक्रमांक लागून विद्यार्थी तशेंच तरणाट्यांक करीयर करपाची सगळ्यांत चड संद गोंयांत आसा. हेर राज्यांपरस सगळ्यांत चड संदी गोंयांत उपलब्ध आसा. हाका लागून पद्वी उपरांत कितें करप? असो प्रस्न विद्यार्थी तशेंच तरणाट्यां खातीर आसपाक जायना, अशें मुख्यमंत्री डॉ. प्रमोद सावंत हांणी म्हणलां.
ताळगांव डॉ. श्यामाप्रसाद मुखर्जी स्टेडियमाचेर मंगळारा कॉन्वर्ज ३.० परिशदेचें उक्तावण जालें. ह्या वेळार मुख्यमंत्री उलयताले. हे परिशदेंत विद्यार्थी तशेंच उद्देजक वाटेकार जाल्यात.
गोंयांत नामनेच्यो शिक्षण संस्था आसात. म्हाविद्यालयां तशेंच विद्यालयांनी सगल्यो सुविदा उपलब्ध आसात. ते भायर स्टार्ट अप धोरण तयार जालां. कुशळटाय प्रशिक्षणा सयत विवीध अभ्यासक्रम उपलब्ध आसात. हाका लागून नोकरे सयत स्टार्ट अप सुरू करप शक्य आसा. नोकरी दिवपा परस नोकर्यो तयार करपाचें उद्दिश्ट विद्यार्थ्यांनी दवरपाक जाय.
प्रधानमंत्री नरेंद्र मोदी हांणी आत्मनिर्भर भारताचे उद्दीश्ट दवरलां. हेच फाटभूंयेर गोंय सरकारान विकसीत गोंय २०३७चें उद्दीश्ट दवरलां. स्वयंपूर्ण गोंय मोहीमेक लागून गोंयचें स्वयंपूर्णते कडेन वाटचाल सुरू आसा. गोंय हें नवनिर्मितीचें केंद्र जावपाचे नदरेन वाटचाल सुरू आसा, अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
