भांगरभूंय | प्रतिनिधी
मंत्र्याच्या बंगल्या वेल्या मोर्चावेल्यान मनोज – विजया मदीं नवो वाद
पणजी : नगरनियोजन कायद्यांतलो कलम ३९ अ रद्द करप वा पाळें शिरदोणच्या झोन बदल रद्द करपा विशीं सरकारा कडल्यान कसलेच तरेचें ठोस आस्वासन मेळूंक नाशिल्ल्यान आमदार विरेश बोरकार हांचे सयत ग्रामस्थांचें आंदोलन आझाद मैदानार मंगळाराय चालूच आसा. ग्रामस्थ आपले मागणेचेर ठाम आसात. जाल्यार सरकारा कडल्यानूय चर्चे विशीं कसलेच तरेचो प्रस्ताव नाशिल्ल्यान तोडग्याची रोखडीच शक्यताय ना.
नगरनियोजन मंत्री विश्वजीत राणे हांच्या बंगल्यार काडिल्ल्या मोर्चा वेल्यान आतां आरजीचे मुखेली मनोज परब आनी गोवा फॉरवर्डचे आमदार विजय सरदेसाय हांचे मदीं नवो वाद निर्माण जाला.
पाळें शिरदोणचे झोन बदलाचे मागणे खातीर आमदार विरेश बोरकार हांच्या नेतृत्वा खाला ग्रामस्थांनी शुक्रारा सावन आंदोलन सुरू केल्लें. शुक्रारा पाट्या वयले नगरनियोजन खात्याचे इमारतींत बसकण मारले उपरांत शेनवारा ग्रामस्थांक भायर काडिल्ले. उपरांत आझाद मैदानार आंदोलन सुरू जालें. सोमारा सांजे वेळार सर्वपक्षीय आंदोलनाचो उलो मारलो तेन्ना अचकीत मंत्री विश्वजित राणे हांच्या घरार मोर्चा व्हेलो. उपरांत सोमारा रातीं ग्रामस्थांनी परत आझाद मैदानार आंदोलन सुरू केलें. भलायकी इबाडिल्ल्यान सोमारा रातीं खासगी हॉस्पिटलांत दाखल केल्ले आमदार बोरकार हांकां सकाळीं डिस्चार्ज दिलो. उपरांत परत ते आंदोलनांत वाटेकार जाले. आंदोलन प्रस्नाचो तोडगो वा चर्चे विशीं कसलोच प्रस्ताव नाशिल्ल्यान आंदोलन चालूच उरपाची चिन्नां आसात.
मनोज – विजया मदीं आरोप प्रत्यारोप
मंत्र्याच्या खासगी बंगल्यार मोर्चा व्हरप अयोग्य आशिल्ल्याचें सांगून आमदार विजय सरदेसाय हे मोर्चांतल्यान फाटीं सरिल्ले. हाचे वेल्यान आरजीचे मुखेली मनोज परब हांणी तांचेर मंगळारा खर शब्दांनी टिका केली. राज्यांतली जमीन रूपांतरणाची सुरवात कलम १६ ब वरवीं विजय सरदेसाय हांणी केली. ३९ अ क विरोध जालो तेन्नाय ते नाशिल्ले. कोण फटींगपणां करता तें आतां समजलां, असो आरोप परब हांणी केलो.
मंत्र्याच्या खासगी घराचेर मोर्चा व्हरप अयोग्य आसा. लोकांक ७ किमी चलपाक लावप म्हळ्यार तीं गोरवां नाशिल्लीं. हातूंत लोकांचे सुरक्षेचो प्रस्न निर्माण जाल्लो, अशें सरदेसाय हांणी म्हणलें. जमीन रूपांतरणाच्या आरोपाक मात तांणी जाप दिवंक ना. जांणी आरोप केला, तो जाप दिवपाचे पात्रतेचो ना, इतलेंच तांणी म्हणलें.
गोंयांत जमीन रूपांतरणाची सुरवात १६ ब वरवीं विजय सरदेसाय हांणी केली. ३९ अक विरोध जालो तेन्नाय ते नाशिल्ले. कोण फटींपणां करता, तें आतां स्पश्ट जालां अशें आरजी मुखेली मनोज परब हांणी म्हणलें.
मंत्र्यांच्या घराचेर मोर्चा व्हरप अयोग्य. लोकांक ७ किमी चलपाक लावप म्हळ्यार तीं गोरवां नाशिल्लीं. म्हजेर जांणी आरोप केला, तो जाप दिवपाचे पात्रतेचो ना, अशें सरदेसाय हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
