भांगरभूंय | प्रतिनिधी
पणजी : पणजी शार १८० वर्सां पोरणें. ह्या काळांत पणजेंत विवीध पक्षांनी, देशांनी राज्य केलें. मात फाटलीं पांच वर्सां बापूय आनी पुताचे जोडयेन पणजेचो विध्वंस केला. हे जोडी पसून पणजेक वाटोवपा खातीर आम आदमी पक्ष आमी पणजेकार पॅनलाक तेंको दिता अशें आप प्रदेशाध्यक्ष वाल्मिकी नायक हांणी सांगलें, बुधवारा तांणी माध्यमां कडेन संवाद सादलो. ह्या वेळार दत्तप्रसाद नायक, सुरेंद्र फुर्तादो हाजीर आशिल्ले.
पणजे बापूय-पुताच्या फॅमिली राज्यान थळाव्यांक त्रास जाता. हें जर सोंपोवंक ना जाल्यार एक दीस पणजेकारांक हांगचे भायर धांवडावचे पडटले. हाका लागून सगल्यांनी एकठांय येवन लढप गरजेचें. आमी पणजेकारांक ह्यान पयलीं वेगवगेळी विचारसरणी आशिल्ल्या लोकांनी, पक्षांनी तेंको दिला. हाका लागून आमीय ह्या पॅनलाक तेंको दिवपाचो निर्णय घेतला. पणजेकारांनी महापालिका वेंचणुके सयत आमी पणजेकार पॅनलाच्या उमेदवारांक जैतिवंत करचें.
दत्तप्रसाद नायक हांणी सांगलें : फाटल्या एका वर्सा पसून आमी समविचारी लोकां कडेन उलयतात. आमी सगल्या प्रभागांत उमेदवार दिल्यात. तांचीं नांवां बेगीनूच जाहीर करतले. आमच्या पॅनलांतल्या उमेदवारांक धमक्यो येतात. राज्यांतल्या थारावीक चार ते पांच कुटुंबांनी गोंयची वाट लायल्या. हें मतदान म्हणल्यार तांतल्या एका कुटुंबाक सत्तेभायर करपाची आमकां एक संद आसा. हाका लागूनच थळाव्यांनी आमच्या पॅनलाक तेंको दिवचो.
प्रभाग फेररचणुकेंत थळाव्यांचेर अन्याय
दत्तप्रसाद नायक हांणी सांगलें : फेररचणुकेंत थळाव्यांचेर अन्याय जाला. प्रभाग १ बायलां एसटी , प्रभाग २ आनी ३ बायलां ओबीसी करून थंयच्या थळाव्यांक वेंचणूक लढोवपा पसून पयस दवरपाचो यत्न केला.
जाहीरनामो बेगीनूच
आमच्या पॅनेलाचो जाहीरनामो बेगीनूच जाहीर करतले. हे विशीं आमी ‘आमी पणजेकार’ वेबसायटीचेर एक फॉर्म अपलोड केला. हाचेर लोकांच्यो येवपी प्रतिक्रिया पळोवन जाहीरनामो तयार करतले, अशें दत्तप्रसाद नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
