भांगरभूंय | प्रतिनिधी
मतदार उणें जाल्ल्यान समिकरणां बदलतलीं
केतन भाटीकार हांचो आयज कॉंग्रेसींत प्रवेश
पणजी: आदले मुख्यमंत्री रवी नायक हांकां आयिल्ल्या मरणाक लागून आतां रोखडीच फोंडें मतदारसंघात पोटवेंचणूक जावपाची आसा. फाटले वेंचणुकेंत मगो उमेदवार डॉ. केतन भाटीकार हे आयज काँग्रेसीत प्रवेश करतले. पोटवेंचणुकेक लागून फोंडें मतदारसंघातलें राजकी वातावरण तापपाक लागलां. आतां एसआयआर उपरांत फाटलें वेंचणुकेचे तुळेंत फोंडें मतदारसंघात 4230 मतदार उणें जाल्या. हाका लागून सगलीं राजकी समिकरणां बदलतलीं. उणें जाल्ल्या मतदारांचो आंकडो मतींत घेवन राजकी पक्ष आनी उमेदवारांक रणनिती आंखची पडटली.
फुडल्या वर्सा विधानसभेची वेंचणूक जातली. पर्यें मतदारसंघ सोडलो जाल्यार हेर सगल्या मतदारसंघांनी एसआयआर उपरांत मतदारांचो आंकडो देंवला. गोंयांत अशे 24 मतदारसंघ आसात की तातूंत मतदारांचो आंकडो 2 हजारां परस चड उणो जाला.
फोंडें मतदारसंघात 2022चे वेंचणुकेंत 32157 मतदार आशिल्ले. एसआयआर उपरांत मतदारांचो आंकडो देंवून तो 27927 जाला. फाटले खेपे भाजपाचे सर्गेस्त रवी नायक हे फक्त 77 मतांनी जैतिवंत जाल्ले. निकाला उपरांत रवी नायक हे फक्त 1 मतांनी जैतिवंत जाल्ल्यान डॉ. केतन भाटीकार हांणी परतून मतमेजणी मागली. परतून मतमेजणी उपरांत रवी नायक हे 77 मतांनी जैतिवंत जाले. रवी नायक हांकां 7514 जाल्यार डॉ. केतन भाटीकार हांकां 7437 मतां मेळ्ळीं. ते भायर काँग्रेसीचे राजेश वेरेंकार हांकां 6839 जाल्यार आरजीचे सानीश तिळवे हांकां 1770 मतां पडलीं. सगल्यांत अटीतटीची लडत फोंडें मतदारसंघांत जाल्ली.
आतां मगो पक्ष सरकारांत आशिल्ल्यान भाजप – मगोचो एकूच उमेदवार आसतलो. काँग्रेसीचे राजेश वेरेंकार वेंचणूक लडोवपाक इत्सूक आसतानाच आयज डॉ. केतन भाटीकार हे काँग्रेसींत प्रवेश करतात. हाका लागून काँग्रेसीची उमेदवारी डॉ. केतन भाटीकार हांकां मेळटली काय राजेश वेरेंकार हांकां मेळटली? हे विशीं उमळशीक आसा. उमेदवारी वेल्यान काँग्रेस पक्षांत दुफळी तयार जाल्या. उणी जाल्ली मतां तशेंच मतविभागणेचेर फोंडेचो निकाल निंबून आसतलो.
वर्सागणीक मतदारांचो आंकडो वाडटा. एसआयआर उपरांत मात फोंडें मतदारसंघात 4 हजारां वयर मतदार उणें जाल्यात. हाका लागून रणनिती आंखप, उमेदवार तशेंच राजकी पक्षां मुखार आव्हान थारला.
मजगतीं, मंगळारा जावपी कार्यावळींत केतन भाटीकार हांचे सयत हेर कार्यकर्ते काँग्रेसीत प्रवेश करतले. केतन भाटीकार हांच्या काँग्रेस प्रवेशा उपरांत फाटल्या कांय वर्सां सावन काँग्रेस पक्षाचें काम करपी राजेश वेरेंकार कसली भुमिका घेतात हाचे कडेन सगल्यांचें लक्ष लागून उरलां. कारण काँग्रेस उमेदवारी खातीर राजेश वेरेंकार हांच्या नांवाचो विचार हाचे पयलीं केल्लो. पूण मतदारसंघांतलीं राजकी समिकरणां बदलत आशिल्ल्यान केतन भाटीकार हांकां काँग्रेस पक्षांत प्रवेश दिवन नवो प्रयोग करपाचो विचार पक्षश्रेश्ठी करपाची शक्यताय उक्तायतात.
भाजप गटांत नगरसेवक रितेश नायक, नगरसेवक विश्वनाथ दळवी आनी हेर कांय जाण वेंचणूक लडोवपा खातीर इत्सूक आसात. हातूंत आदले खासदार नरेंद्र सावयकार हांचो लेगीत विचार जावपाची शक्यताय कार्यकर्त्यांनी उक्तायली.
फाटल्या कांय दिसां सावन नगरसेवक रितेश नायक आनी नगरसेवक विश्वनाथ दळवी हांणी लोकां कडेन संपर्क सादपा खातीर चड वेळ दिला. ताका लागून पोटवेंचणुकेंत भाजप खंयच्या उमेदवाराक उमेदवारी जाहीर करतलो हाचे कडेन सगल्यांचे लक्ष लागून उरलां.
मगो पक्षाचे आमदार आनी वीज मंत्री सुदिन ढवळीकार हांणी पोटवेंचणुकेंत मगो पक्ष भाजपा बराबर आसतलो अशें जाहीर केलां. ताका लागून पोटवेंचणुकेक रंगत येतली अशें दिसून येता.
मंगळारा जावपी कार्यावळींत काँग्रेस पक्षांत प्रवेश करपी केतन भाटीकार हांणी पत्रकारां कडेन उलयतना पक्षांत प्रवेश निश्चीत जाला, आनी वरिश्ठ फुडारी कार्यावळीक हाजीर रावतले. काँग्रेस पक्षाच्या वरिश्ठ फुडाऱ्यां कडेन अजून मेरेन उमेदवारी विशीं कसलोच निर्णय जाल्लो ना. पूण फोंडें मतदारसंघांतल्या सगल्या काँग्रेस कार्यकर्त्यांक बराबर घेवनूच पक्षाचें काम मुखार व्हरतलों अशें तांणी सांगलें.
भाजपांत उमेदवारी खातीर सद्या चडाओड सुरू आसा. पूण मतदारसंघांत भंडारी समाजांतलो उमेदावार दिवपाचो आसा अशी म्हायती गोपां कडल्यान मेळ्ळी. ताका लागून रितेश नायक आनी भाज प्रदेशाध्यक्ष दामू नायक हांचो लेगीत भाजप उमेदवारी खातीर निर्णय पक्ष श्रेश्ठी घेवपाची शक्यताय कार्यकर्त्यांनी उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
