भांगरभूंय | प्रतिनिधी
एनआयओंत ओशियन कॉंग्रेसीचें उक्तावण
पणजी : विकसीत गोंय २०३७चे उद्दीश्ट साध्य करपा खातीर सागरी अर्थवेवस्थेचे योगदान मोलादीक थारतलें. गोंयचें पर्यटन, नुस्तेंमारी तशेंच हेर बरेच वेवसाय उदक वा दर्या संबंदी आसा. परंपरीक सागरी ज्ञानाक आधुनीक तंत्रज्ञानाची जोड मेळ्यार सागरी अर्थवेवस्था आनीक घटमुट जातली, अशी आस्त मुख्यमंत्री डॉ. प्रमोद सावंत हांणी उक्तायली.
दोना पावलच्या एनआयओ सभाघरांत सोमारा संवसारीक सागरी परिशदेचें (ओशियन कॉंग्रेस) उक्तावण जालें. उक्तावण सुवाळ्याक गोंय विद्यापीठाचे कुलगुरू हरिलाल मेनन, विज्ञान भारतीचे अध्यक्ष प्रसाद रांगणेकार आनी हेर मानेस्त हाजीर आशिल्ले. गोंयांत एनआयओ, एनसीएओआर, कृशी संशोधन संस्था, आयुश संस्था, आयआयटी, एनआयटी अशो संस्था आसा. हाका लागून विज्ञानाचो प्रचार आनी विज्ञानीक वातावरण गोंयांत बर्या प्रमाणांत आसा.
सन, सॅण्ड ऍन्ड सी खातीर गोंय संवसारांत फामाद आसा. हाका सायन्स म्हणजे आनीक एक एस जोडपाची गरज आसा. गोंयच्यो दर्यादेगो ह्यो पर्यटन मळार फामात आसा. पर्यटन, नुस्तेंमारी, जहाज बांदणी हे उद्देग दर्याचेर निंबून आसात. गोंयची २५ टक्के जनता ही प्रत्यक्ष वा अप्रत्यक्ष तरेन दर्याकडेन संबंदीत आसा. अशा ह्या गोयांत संवसारीक मळावेली सागरी परिशद जावप ही अभिमानाची गजाल आसा. नुस्तेंमारी तशेंच दर्या संबंदी संपत्तीचो चडांत चड लाव तंत्रज्ञानाच्या मजतीन घेवपाक जाय. हाचेर परिशदेंत विचार जातलो. तशेंच उदकाचो स्रोत तशेंच दर्यात जावपी प्रदुशणाचेर नियंत्रण दवरपाचें लेगीत आव्हान आसा. दर्यासंबंदी वेवसायांत सादनसुविदा तयार करून रोजगार संद वाडोवपाची गरज आसा, अशें डॉ. सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
