भांगरभूंय | प्रतिनिधी
येवपी अर्थसंकल्पांत येवजणेक २० कोटीं परस चड तजवीज
पणजी : गोवा ग्राम समृद्दी येवजणे खाला दरेकी मतदारसंघांत उण्यांत उणो एक तरी प्रकल्प पुराय जातलो. तशेंच अर्थसंकल्पांत हे येवजणे खातीर फाटल्या वर्सा केल्ल्या २० कोटीं परस अंदूं चड तजवीज करतले, अशें मुख्यमंत्री डॉ. प्रमोद सावंत हांणी सांगलां.
ह्यान फुडें आमदारांनी शिफारस केल्ल्या प्रकल्पांक प्राधान्य दिवपाचो निर्णय जाला. मुख्यमंत्री डॉ. प्रमोद सावंत हांणी बसका घेवन गोवा ग्राम समृद्दी येवजणेचो नियाळ घेतलो. हे येवजणेची आरडीए खात्या वरवीं कार्यवाय जाता. हे येवजणे खाला राज्यांत १३१ प्रकल्प सुरू आसात. ह्या प्रकल्पांचे कार्यवायेचो मुख्यमंत्र्यांनी नियाळ घेतलो. बसकेक आरडीएचे अधिकारी हाजीर आशिल्ले.
फाटल्या अर्थसंकल्पात गोवा ग्राम समृद्दी येवजणे खातीर २० कोटींची तजवीज आशिल्ली. दरेकी मतदारसंघांत प्रकल्प राबोवपा खातीर येवपी अर्थसंकल्पांत २० कोटीं परस चड तजवीज जातली, अशी हमी मुख्यमंत्र्यांनी दिली.
संतुळीत उदरगत करपा सयत गांवगिर्या वाठारांत कल्याणकारी प्रकल्प राबोवपा खातीर गोवा ग्राम समृद्दी येवजण सरकारान सुरू केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
