भांगरभूंय | प्रतिनिधी
पणजी : बंगालच्या उपसागरांत तयार जाल्लो उण्या दाबाचो पट्टो, तशेंच हेर वातावरणाच्या कारणांक लागून सोमारा वातावरण दमट आशिल्लें. हवामान खात्यान राज्यांत पावस शिरशिरपाची शक्यताय उक्तायल्या. उत्तर गोंयांत सकाळीं पावस पडलो. फुडले पांच दीस राज्यांतलें वातावरण दमट उरपाची शक्यताय हवामान खात्यान उक्तायल्या.
सोमारा राज्यांत चडांत चड तापमानांत मात्सोप उणाव जाणवलो. मात उण्यांत उणो तापमान वाडिल्ल्यान उश्णताय कायम आशिल्ली. पणजे ३३ अंश जाल्यार मुरगांवां ३५.२ अंश सेल्सिअस चडांत चड तापमानाची नोंद जाली. फुडले कांय दीस पारो ३३ ते ३५ अंश सेल्सिअस मजगतीं उरपाची शक्यताय आसा. फुडले तीन ते चार दीस तापमानांत वाड कायम उरतली.
सोमारा पणजे उण्यांत उणें २५ अंश, जाल्यार मुरगांवां २३.६ अंश उण्यात उणें तापमानाची नोंद जाली. २८ फेब्रुवारी मेरेन राज्यांतलो उण्यात उणो तापमान २१ ते २३ अंश सेल्सिअस मजगतीं उरपाची शक्यताय खात्यान उक्तायल्या. राज्यांत २३ ते २८ फेब्रुवारी मजगतीं कांय सुवातांचेर मध्यम स्वरुपाचें धुकें पडपाची शक्यताय आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
