भांगरभूंय | प्रतिनिधी
पणजी : गोंयांत वर्सभरात 259 मॅट्रीक टन भाजी आनी बागायतींतल्या पिकांचें उत्पन्न निर्गती खातीर तयार जाल्लें. हातूंत भाजयेची 124 मॅट्रीक टन आनी बागायती पिकांची 135 टन पिकावळ तयार आशिल्ली, अशी आंकडेवारी शेतकी आनी अन्न निर्गत उदरगत प्राधिकरण (एपीडा) हांणी दिल्या.
एपीडा हांणी जारी केल्ल्या अहवालांत म्हायती दिल्या, 2023- 24 त गोंयांत निर्गती खातीर कणगां, अळमी आनी हेर भाजयाची पिकावळ काडल्या. जाल्यार बागायती पिकांत सुपारी, नाल्ल आनी काजू हांची पिकावळ काडल्या. सगल्यांत चड अळम्यांची पिकावळ तयार जाल्या जाल्यार काजूची पिकावळ काडपांत गोंय हें देशांतल्या पयल्या 10 राज्यां मदीं येता.
गोंयांत कणगांची 0.28 मॅट्रीक टन इतली पिकावळ काडल्या आनी देशांत हे पिकावळीचो 0.28 टक्के इतलो वांटो आसा. कणगांचें उत्पन्नाचे बाबतींत गोंय 21 वे सुवातेर आसा. तशेंच अळम्याची 9.39 मॅट्रीक टन इतली पिकावळ तयार जावन देशांत हे पिकावळीचो 2.70 टक्के इतलो वांटो आसा. अळमी उत्पन्ना बाबतींत गोंय 14 वे सुवातेर आसा. तशेंच 114.54 मॅट्रीक टन हेर तरांच्यो भाजयो पिकावळ तयार जावन देशांत हे पिकावळीचो 0.50 टक्के इतलो वांटो आसा. तेतच प्रमाण, बागायती पिकांचे बाबतींत गोंयांत सुपारीची 3.98 टक्के इतली पिकावळ तयार जावन देशांत हे पिकावळीचो 0.28 टक्के इतलो वांटो आसा. सुपारी उत्पन्ना बाबतींत गोंय 12 वे सुवातेर आसा. जाल्यार काजूची 26.07 टक्के इतली पिकावळ तयार जावन हे पिकावळीचो देशांत 3.28 टक्के वांटो आसा. काजू उत्पादनांत गोंय हें देशांत सातवे सुवातेर आसा. जाल्यार नाल्लाची 105 मॅट्रीक टन इतली पिकावळ तयार जावन हे पिकावळीचो देशांत 0.71 टक्के इतलो वांटो आसा. नाल्लाच्या उत्पन्ना बाबतीत गोंय 11 वे सुवातेर आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
