भांगरभूंय | प्रतिनिधी
पणजी : पणजी म्हानगरपालिकेचे वेंचणुके खातीर शेनवारा 21 फेब्रुवारीक 3 जाणांनी उमेदवारी अर्ज दाखल केले. तातूंत प्रभाग नं. 12 तल्यान (सर्वसामान्य) ब्रिजेश कवळेंकार, प्रभाग नं. 26 तल्यान (सर्वसामान्य) नम्रता सरदेसाय जाल्यार प्रभाग नं. 28 तल्यान (सर्वसामान्य) दत्तराज हळर्णकार हांणी अर्ज सादर केल्यात. शेनवारा निमाणे मेरेन वट्ट 35 जाणांनी उमेदवारी अर्ज सादर केल्यात.
म्हानगरपालिका वेंचणुके खातीर शुक्रारा भाजप समर्थीत बाबूश मोन्सेरात हांच्या पॅनलांतल्या 30 जाणांनी उमेदवारी अर्ज सादर केल्ले. जाल्यार उत्पल पर्रीकार हांच्या आमी पणजेकार ह्या पॅनलांतल्या फकत सुरेंद्र फुर्तादो हांणी अर्ज सादर केलो. हे आदीं पर्रीकार हांणी उमेदवारांचीं नांवां योग्य वेळार जाहीर कररतले अशें सांगिल्लें. विरोधी पॅनला कडल्यान चेपण येवपाची शक्यताय आशिल्ल्यानूच आमी पणजेकार पॅनलाचीं नांवां आयत्या वेळार जाहीर करतले.
मेळिल्ले म्हायती प्रमाण, प्रभाग नं. 7 तल्यान सुरेंद्र फुर्तादो हांचो पूत लियोनीड फुर्तादो हे आमी पणजीकार पॅनला वतीन अर्ज भरतले. प्रभाग 6 तल्यान दत्तप्रसाद नायक हांची घरकान्न शितल नायक, प्रभाग नं. 13 तल्यान नरेश च्यारी हे लेगीत आमी पणजीकार पॅनला वतीन अर्ज भरपाची शक्यताय आसा. ते भायर दोन वा तीन प्रभागांनी आमी पणजेकार पॅनला वतीन बाबूश पॅनलाच्या विरोधांत लडपी उमेदवारांक तेंको दिवपाची शक्यताय आसा.
प्रभाग नं. 9 त सुरेंद्र फुर्तादो हांची लडत बाबूश पॅनलांतल्या कबीर पिंटो मखिजा हांचे वांगडा जातली. प्रभाग 6 त शितल नायक आनी सिल्वेस्टर लॉरेना, प्रभात 7 त लियोनीड फुर्तादो हांची संजीव देसाय जाल्यार प्रभाग 13 त नरेश च्यारी हांची उदय मडकयकार हांचे वांगडा लडत जातली. वयल्या प्रभागांनी बाबूश आनी पर्रीकार पॅनल हांचे मदीं थेट लडत जावपाची शक्यताय आसा. प्रभाग नं. 17 त सुखीजा हे अपक्ष म्हूण वेंचणूक लडयतात.
म्हापालिका वेंचणुके खातीर उमेदवारी अर्ज सादर करपाची निमाणी मुजत 24 फेब्रुवारीक दनपारां 1 वरा मेरेन आसा. अर्जाची छाननी 25 फेब्रुवारीक जातली आनी मतदान 11 मार्चाक जातलें. 13 मार्चाक श्यामाप्रसाद मुखर्जी स्टेडियमाचेर मतमेजणी जातली. वेंचणुकेंत भाजप समर्थीत मंत्री बाबूश मोन्सेरात हांचें पॅनल आनी उत्पल पर्रीकार हांच्या आमी पणजेकार ह्या पॅनला मदीं थेट लडत जातली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
