भांगरभूंय | प्रतिनिधी
भावंडांनो,
आमच्या जिवितांत आमचे भोंवतणी संशोधनाचीं इतलीं बियां शिंवरलेलीं आसात, तीं आमकां पावला कणकणीं जाणवतात. पुणून तीं नेमान दिसत आशिल्ल्यान तातूंतलें म्हत्व आमकां सट्ट करून जाणवना. मात, तशेंच संशोधनाची नदर लायिल्लीं भावंडां उमळशिकेन त्या दरेक बिंयांचेर विचार करतात. तो विचार करतना तांच्यात त्या बिंयां विशीं जाणून घेवपाची उमळशीक लागता. ते उमळशिकेंत तीं सवकासायेन बसून रावनात. त्या बिंयां विशीं खोलायेन खाशेली म्हायती पुंजावपाक तीं वावुरतात. आपल्या कश्टांचेर त्या बिंयांचें खाशेलें गिन्यान भोंवतणच्यांक दिवपाचो यत्न करतात. भावंडांनो, ताकाच विशेश गिन्यान म्हळ्यार विज्ञान म्हणटात.
भोंवतणी शिंवरलेल्या बिंयांतल्यान आयजवेर आमच्या म्हान उद्यमी संशोधनाची वृत्ती आशिल्ल्या उद्यमी मनशांनी तरेकवार संशोधना आमकां दिल्यांत. तांचो वापर आमी आमच्या दिसपट्ट्या जिवितांत नेमान करतात. त्या संशोधनां वरवींच आमी आमचें जिवीत सोंपे रितीन, सुरळीतपणान जियेतात. ह्या विज्ञानाक आमच्या जिवितांत खूब म्हळ्यार खुबूच म्हत्व लागिल्लें आसा. ह्या संशोधना विणें आमचें जिणें लुळें पडटा अशें म्हणल्यार गैर जावचें ना.
आमच्या चाचा नेहरून सांगिल्लें, ‘विज्ञाना बगर राष्ट्राची उबारणी जायना.’’ खरेंच आसा तांचें म्हणणें. लाल बहादूर शास्त्री हांणी ‘जवानांचें आनी किसानांचें’ म्हत्व आमकां सांगून, देशाक ’जय जवान, जय किसान’ हें ब्रीदवाक्य दिलें. उपरांत जवान आनी किसानाच्या सांगातान विज्ञानाकय तितलेंच म्हत्व आसा हें सांगतना आदले प्रधानमंत्री अटल बिहारी वाजपेयी हांणी ‘जय जवान, जय किसान, जय विज्ञान’ हो मंत्र आमकां दिलो.
भावंडांनो, म्हत्वाचें सांगपाचें म्हणल्यार विज्ञानाचो आमचे जिणेंत खूब मोलाचो वांटो आसा. ताचे बगर आमी जगुंकच शकनात. देखूनच ताचें म्हत्व जाणून घेवपाक, तगून दवरपाक आमी विज्ञान दीस पाळटात. ते वरवीं भोंवतणी जागृताय घडोवन हाडटात. पुणून एक सांगतां, हो विज्ञान दीस आमी खास करून जाचे नांवान वा यादीन पाळटात ते म्हणल्यार म्हान पदार्थशास्त्रज्ञ, गणीत तज्ञ सर सी.वी. रामन. तांच्या ‘रामन इफेक्ट’ संशोधना वेल्यानूच तांचे जयंती निमतान आमी तो दीस देसभर तरेकवार विज्ञानीक कार्यावळी वरवीं मनयतात. तांची जयंती 28 फेब्रेराक मनयतले. त्या निमतान आमी तांकां याद करूया आनी आर्गां ओंपुया.
भावंडांनो, आनीक एक गजाल मतींत दवरात ती म्हणल्यार विज्ञान हें देशाचे उदरगती खातीर आसा. संवसाराच्या इबाडा खातीर न्हय. देखून भावंडांनो, आमचे कडेन जें आसा ताची राखण करुया.
उल्हासभाई
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
