भांगरभूंय | प्रतिनिधी
आक्षेप आशिल्ल्यांक 15 दिसांनी अर्ज करपाची मेकळीक
निमाणी वळेरी सीईओ गोवा वॅबसायटीचेर अपलोड
मॅप जावंक नाशिल्ले 38 हजार 780 मतदार अपात्र
भांगरभूंय | प्रतिनिधी
पणजी : गोंयांतल्या मतदारांची विशेश खोलायेन फेरतपासणी (एसआयआर) पुराय जाले उपरांत निमाणे वळेरेंतल्यान वट्ट 1 लाख 27 हजार 468 मतदारांचीं नांवां वगळ्ळीं. निमाणे मतदार वळेरेंत 10 लाख 57 हजार 566 मतदारांचीं नांवां दवरल्यांत. हातूंत 5 लाख 11 हजार 436 दादले, 5 लाख 46 हजार 121 बायलां, जाल्यार 9 तृतीय पंथी मतदार आसात. वगळिल्ल्यां नांवां विशीं कितेंय आक्षेप आसल्यार फुडल्या 15 दिसांनी जिल्होधिकारी कार्यालयांत अर्ज करपाक मेळटले अशी म्हायती मुख्य वेंचणूक अधिकारी संजय गोयल हांणी दिली. शेनवारा पणजे जाल्ले पत्रकार परिशदेंत ते उलयताले.
गोंयांत एसआयआर प्रक्रिया 27 ऑक्टोबर 2025 दिसा सुरू जाली. तेन्ना मतदार वळेरेंत 11 लाख 85 हजार 34 मतदारांचीं नांवां आशिल्लीं. 16 डिसेंबर 2025 दिसा जारी केल्ले मसुदो वळेरेंतल्यान मरण आयिल्ल्या, हाजीर नाशिल्ल्या, दोन नांवां आसप वा नामो कायमचो बदलिल्ल्या 1 लाख 42 मतदारांचीं (एएसडीडी) नांवां सोडल्यांत. मसुदो वळेरेंत 9 लाख 2 हजार 589 मॅप जाल्ले, तशेंच 1 लाख 82 हजार 403 मॅप जावंक नाशिल्ल्या अशा वट्ट 10 लाख 84 हजार 992 मतदारांचीं नांवां आशिल्लीं. मॅपींग जावंक नाशिल्ल्या मतदारांक नोटीस धाडून हे विशीं सुनावण्यो घेतल्यो.
तशेंच मॅप जाल्ल्या वट्ट मतदारां मदल्या 58 हजार 923 मतदारांकूय कांय अनियमितता सांपडिल्ल्यान नोटिसो धाडिल्ल्यो. सुनावणे उपरांत अनियमितताय आशिल्ल्या तशेंच मॅप जावंक नाशिल्ल्या वट्ट 38 हजार 780 मतदारांक अपात्र थारयल्यात. मसुदो वळेरी प्रसिद्ध जाले उपरांत अर्ज 6 वरवीं 12 हजार 166 मतदारांचीं नांवां निमाणे मतदार वळेरेंत घातलीं. जाल्यार 39 हजार 592 सोडल्यांत. हाका लागून मसुदो वळेरेंतल्यान वट्ट सोडिल्ल्या मतदारांची संख्या 27 हजार 426 (2.53 टक्के) इतली आसा. सगल्या राजकी पक्षांच्या प्रतिनिधींक मतदारासंघ तशेंच बूथ प्रमाण वगळिल्ल्या नांवांची, तशेंच निमाणी वळेरी दिल्या. निमाणी वळेरी सीईओ गोवा हे वॅबसायटीचेरूय अपलोड केल्या, अशें गोयल हांणी सांगलें.
16 हजार पुर्तुगीज पासपोर्ट धारक
गृह मंत्रालय, पासपोर्ट कार्यालय तशेंच एफआरआरओ हांचे कडल्यान आयिल्ले म्हायती प्रमाण, गोंयांत 16 हजार 721 जाणां कडेन पुर्तुगीज पासपोर्ट आसात. हातूंतल्या 428 जाणांचीं नांवां मसुदो वळेरेंत आयिल्लीं. हातूंतल्या 420 जाणांचीं नांवां सोडल्यांत. हेर 8 जाणांचीं नांवां बेगिनूच सोडटले.
फुडली प्रक्रिया
निमाणे वळेरी विशीं फुडल्या पंदरा दिसांनी जिल्होधिकारी कार्यालया कडेन आक्षेप नोंद करपाक मेळटलो. तरी समाधान जावंक ना जाल्यार ताचे फुडल्या 30 दिसांनी मुखेल वेंचणूक अधिकारी कार्यालयांत हरकत घेवपाक मेळटली, अशें गोयल हांणी सांगलें.
आंकडेवारी
तारीख / मतदार संख्या
27 ऑक्टोबर 2025- 11 लाख 85 हजार 34
16 डिसेंबर 2025 (मसुदो वळेरी)- 10 लाख 84 हजार 992
21 फेब्रुवारी 2026 (निमणी वळेरी)- 10 लाख 57 हजार 566
निमाणे वळेरेंत 14 हजार नवे मतदार
निमाणे वळेरेंत 18 ते 19 वर्सां पिराय आशिल्ल्या 14 हजार 484 (1.36 टक्के) मतदार आसात. जाल्यार 85 वर्सां पिराये वयले 10 हजार 338 (0.97 टक्के) मतदार आसात, अशें गोयल हांणी सांगलें.
वास्कोंतल्यान वगळ्ळे सगल्यांत चड मतदार
निमाणे मतदार वळेरेंत वास्को मतदारसंघांतल्यान सगल्यांत चड 11 हजार 657 मतदार वगळ्ळ्यात. ते उपरांत कुठ्ठाळींतल्यान 9389, दाबोळींतल्यान 5489, ताळगांवांतल्यान 4947, सांताक्रूझांतल्यान 4738, पर्वरींतल्यान 4563, पणजींतल्यान 4274 मतदार वगळ्ळ्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
