भांगरभूंय | प्रतिनिधी
पणजी : उजो पालोवपी दळाक बेगीनूच ११२ ह्या आपत्कालीन प्रतिसाद समर्थन प्रणाली कडेन (इआरएसएस) जोडटले. हाका लागून नागरिकांक पुलीस, उजो पालोवपी आनी वैजकी सेवा
एकात्मीक आपत्कालीन हेल्पलायनी वरवीं मेळटली, अशी म्हायती संचालक नितीन रायकार हांणी दिली. शेनवारा पणजे दळाच्या ३८ व्या वर्सुकी तपासणी दीस परेड निमतान आयोजीत कार्यावळींत ते उलयताले. ह्या वेळार भलायकी सचीव यतींद्र मरळकार आनी हेर अधिकारी हाजीर आशिल्ले.
नितिन रायकर हांणी, परेड दिसा दळाच्या कामकाजाची तयारी, शिस्त आनी कार्यक्षमता हाचो आढावो घेवपा खातीर एक म्हत्वाची माची आसा. हाचे वरवीं आमी जीण, मालमत्ता आनी पर्यावरणाची राखण करपाक कटिबद्ध आशिल्ल्याचें समजता. २०२५त दळाक वट्ट ८,००२ कॉल आयले. हातूंत २,८८९ उज्यांच्या आनी ५,११३ आपत्कालीन घडणुकांचो आसपाव आशिल्लो. हाचे मजगतीं १६१ मनीस, जाल्यार ८४२ जनावरांचेर जीव वाटयले. खात्या वतीन मुळावी सुविधा वाडोवपाचेर भर दितात.
वाळपय हालींच आधुनीक उजो पालोवपी केंद्राचें उक्तावण केलें. दिवचल आनी वास्को नव्या उजो पालोवपी केंद्राचें बांदकाम सध्या सुरू आसा. हाका लागून राज्यभर आपत्कालीन प्रतिसाद तांग घटमूट जातली. हांगचें प्रशिक्षण केंद्र विवीध राज्यांतल्या अधिकार्यां खातीर व्यापक जनजागृती उपक्रमां सयत प्रशिक्षण कार्यावळ आयोजीत करता. आतां मेरन हजारांनी नागरीक, शालेय शिक्षक आनी युवा अपदा इश्टांक अग्निसुरक्षा आनी आपत्तीचे तयारेचें प्रशिक्षण दिल्ल्याचें रायकार हांणी सांगलें.
उजो पालोवपी दळांतल्या जवानांचे धैर्य, समर्पण आनी खर परिश्रमांक लागून गोंय राज्यअदीक घटमूट आनी सुरक्षीत आसा. दळाच्या जवानांनी आपली तंदुरुस्ती कायम राखून आपल्या राज्याची सेवा करीत रावची असो उलो भलायकी सचीव यतींद्र मरळकार हांणी मारलो.
रायकार हांणी, उजो पालोवपी दळाच्या कर्मचार्यांक अग्नी सुरक्षा भत्तो (रिस्क अलावन्स) दिवपा विशीं आमी सरकाराक प्रस्ताव धाडला. हे विणीं सरकाराचें आमकां फाटबळ आसा. हाका लागून हो भत्तो बेगीनूच मेळटलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
