भांगरभूंय | प्रतिनिधी
जमीन रूपांतरा विशीं सर्वोच्च न्यायालयाचो म्हत्वाचो निर्णय
पणजी : जमीन रूपांतर वा जमीन वापरांतलो बेकायदेशीर बदल पोस्ट- फॅक्टो मंजुरी वरवीं कायदेशीर करपाक शकना. झोनिंग आनी प्रादेशीक आराखड्याक खरपणान पाळो दिवंक जाय आनी योग्य प्रक्रिये बगर कसलोच बदल बेकायदेशीर आशिल्ल्याचें सर्वोच्च न्यायालयान एका निवाड्यांत स्पश्ट केलां. गोंयांत प्रादेशीक आराखडा आसतानाय जमीन रूपांतराचें प्रमाण वाडिल्ल्यान ह्या निवाड्याचो गोंयांचेरूय परिणाम जावप शक्य आसा.
सर्वोच्च न्यायालयाचे न्यायमुर्ती विक्रम नाथ आनी न्यायमुर्ती संदीप मेहता हांणी पंजाब राज्या विशीं दिल्ल्या निवाड्यांत ही बाब नमूद केल्या. पंजाबांत शिमिटाच्या एका कारखान्या खातीर जमीन रूपांतरीत केल्ली. हाचे आड जनहीत याचिका पंजाब उच्च न्यायालयान भायर मारली. उच्च न्यायालयाच्या निर्णया आड सर्वोच्च न्यायालयांत याचिका दाखल केली. सर्वोच्च न्यायालयान उच्च न्यायालयाचो निवाडा भायर मारीत जमीन रूपांतर बेकायदो आशिल्ल्याचें निरीक्षण नोंद केलां.
जमीन रूपांतराचेर निर्बंध हाडपा खातीर नगर नियोजन कायद्याचें कलम ३९ ए रद्द करपाची मागणी जाता. पर्यावरणाचो सांबाळ करपा वांगडा जमीन राखून गोंय वाटावपा खातीर आदले न्यायाधीश फेर्दिन रिबेलो हांच्या नेतृत्वाखाला लोकचळवळ उबारतात. हे फाटभूंयेर सर्वोच्च न्यायालयान जमीन रूपांतरणा संबंदी म्हत्वाचो निवाडो पंजाबचे एके घडणुके वेल्यान दिलो.
भारतीय घटणेच्या परिशिश्ट २१ खाला जिणे खातीर नितळ आनी निरोगी पर्यावरणाचो अधिकार आसपावता. हाका लागून पर्यावरणांत आडमेळूं हाडप हें परिश्टि २१ चें उल्लंघन थारता. घटणेच्या परिशिश्ट १४ तय अशेंच म्हणलां. उदरगत जरी गरजेची आसल्यार तरी ती पर्यावरणाची संतुळा राखून जावपाक जाय. शाश्वत उदरगतीचो सिद्धांत हो तडजोडीचा नारो न्हय तर प्राधान्यक्रमाचो सिद्धांत. जेन्ना उदरगतीची प्रक्रिया मनशाची भलायकी वा पर्यावरणीय सुरक्षे खातीर धोक्याची थारता तेन्ना नेम संरक्षणाचे वटेन आसपाक जाय. अर्थीक फायदो वा उदरगतीक प्राधान्य दितना नागरी जीवन आनी भलायकेक लुकसाण जावचें ना हाची दक्षता धोरण वा कायदो करतना जावपाक जाय, अशें निरीक्षण सर्वोच्च न्यायालयान घडणुकेंतलो परिशिश्ट १४ आनी २१चा संदर्भ दिवन केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
