भांगरभूंय | प्रतिनिधी
सांगें: मिराबाग- सांवड्ड्यां जावपाच्या आशिल्ल्या बंधार्या आडच्या आंदोलनाक आयज, शुक्रारा इकरा दीस उलगले तरी लोकांक सहकार्य करपाक सरकारचे घटक अजूनय येवंक ना. सरकार कितें करपाक सोदता? २८० करोडांचे सुवातेर खर्च आतां ४०० करोड रुपयांचे पावला. आयज कितल्याशाच लोकांनी येवन बंधार्या आडच्या आंदोलनाक तेंको दिलो. मात थळावे आमदार आनी शेजारचे आमदार आजूनय हांगा पावूंक नात. लोकांक नाका जाल्यार आपल्याकूय नाका, अशें सांगपी थळाव्या आमदारांनी वा उदकास्रोत मंत्र्यांनी लोकांक येवन मेळूंक जाय आशिल्लें. सरकारान आतां लोकांचो अंत पळोवचो न्हय. ना जाल्यार हांगच्यो बायलो दुर्गेचो अवतार घेवपाक फाटीं सरचीं ना, अशी शिटकावणी कांय बायलां आंदोलकांनी दिली.
ह्या वेळार फातोर्डेचे आमदार विजय सरदेसाय हाजीर आशिल्ले. तांणी सांगलें, लोकांक जर बंधारो नाका जाल्यार सरकार कोणा खातीर हो बंधारो हाडटा? ४०० करोड बंधार्या खातीर खर्च करचे परस होच पयसो शेती खातीर खर्च करपाक जाय आशिल्लो. हें सरकार कांय कंपनींक आधार करपा खातीर, फाटल्या दारांतल्यान फायदो करून दिवपाक डब्ल्यूआरडीचे पयशे खर्च करून शेतकारांचेर अन्याय करता. लोकांक जर नाका जाल्यार विशय सोंपूंक जाय. आपूण हो विशय विधानसभेंत मांडटलो.
जे सुवातेर सैमा आड पावल मारलें, ज्या कारणान गांव बुडटा, हाचें सरकारान पडून गेल्लें ना. तांकां दिसता ह्या गांवांत हिंदू लोक चड आसात, म्हणटकच कितेंय जाल्यार निमणे ते आमकांच मतदान करतले. लोकांक जितलें उदक लागना ताचे परसूय चड उदक एमपीएल कंपनीक लागता. तांकांच फायदो करपाक लोकांच्या हिता आड सरकार वावुरता असो आरोप सरदेसाय हांणी केलो.
तारा केरकार हांणी बंधार्याची कित्या खातीर गरज आसा हें पयलीं पळोवपाक जाय आशिल्लें, अशें सांगलें. सरकाराची तिजोरी सोंपोवन उदरगतीच्या नांवान लूट चल्ल्या. जे जनतेक असली उदरगत मान्य ना, जाचो गांवाक फायदो ना, जो लोकहिताचो ना, मागीर हो प्रकल्प कोणा खातीर आसा? ही देवाची सुवात. गणपती विसर्जनाची सुवात. हांगा अस्थी सोडटात. हें खबर आसूनय ही सुवात बोडकावन सरकारान लोकांक संकश्टांत उडोवचें न्हय, अशें तिणें म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
