भांगरभूंय | प्रतिनिधी
पणजीः पाळें- शिरोदनच्या थळाव्यांनी गांवांत जावपी ३९ (अ) खाला प्रस्तावीत झोन बदला आड नगर नियोजन खात्यांत मोर्चा व्हेलो. हो प्रस्तावीत झोन बदल आसा तो फाटीं व्हरचो म्हण तांणी खात्याची मुखेल नगर नियोजन वर्तिका दागूर हांकां घेराव घातलो. मात हो झोन बदल फाटीं घेवपाचें आस्वासन मेळूंक नाशिल्ल्यान थळाव्यांनी खात्याचे कचरेंत बसून निशेध चालूच दवरला.
नगर नियोजन खात्याच्या मंडळान पाळी-शिरोदन गांवांत सैमीक वाठार हो सेटलेमेंट झोनांत रुपांतर करपाचो प्रस्ताव टीसीपी कायद्याच्या कलम ३९ (अ) सकयल दवरला. जर हो झोन आयलो जाल्यार गांवचो विधवंस जातलो. तशेंच रस्ते रुंदीकरण जावन सांतेरी देवीच्या देवळाक धोको निर्माण जातलो असो आरोप करून थळाव्यांनी सांत आंद्रेचे आमदार विरेश बोरकार हांच्या फुडारपणा खाला नगर नियोजन खात्याच्या भायर निदर्शनां केलीं.
आमकां परत परत आश्वासन सरकार दित आसा. मात तें पुराय करपाक अपेयसी थारिल्ल्यान आमकां सेगीत टीसीपीच्या दारार येवचें पडटा. आमी टायम पास करपा खातीर आंदोलन करपाक येवंक ना. आमकां आमचो गांव, आमची जमीन राखपा खातीर आमी फुडें सरल्यात. सरकारान ठोस निर्णय घेवचो. ना जाल्यार थळाव्यांचे शिराप तांकां म्हारग पडटले, अशें बोरकार हांणी सांगलें.
बोवाळ जाले उपरांत पुलिसांनी थळावे आनी आमदाराक मुखेल नगर नियोजक वर्तिका दागूर हांची भेट घडोवन हाडली आनी हे विशीं आमदारान तिका जाप विचारली.
झोन बदलाचो निर्णय हांवें घेवंक ना. हो निर्णय नगर नियोजन मंडळान घेतला. देखून हो झोन बदलाचो प्रस्ताव रद्द करप म्हज्या हातांत न्हय तर मंडळाच्या हातांत आसा, अशें दागूर हांणी सांगलें.
उपरांत मंडळाक प्रस्तावीत झोन बदलाचो निर्णय रद्द करपाक सांगचो आनी हे विशींचो निर्णय आमकां कळोवचो, अशें बोरकार हांणी दागूर हांकां सांगून जो मेरेन निर्णय जायना तो मेरेन कचेरे भितरूच बसून रावपाची शिटकावणी दिली.
आमी येतना चादर, उशीं आनी जेवण करपा खातीर आयदणां, चूल घेवन आयल्यांत. फक्त पाळी-शिरदोन न्हय तर पुराय सांत आंद्रे मतदारसंघातले लोक झोन बदल प्रस्ताव रद्द जायना तो मेरेन आमी हे सुवातेवेल्यान कशेच हालचेनात. जो मेरेन आमकां खर निर्णय कळयना जाल्यार आमी नगर नियोजन खात्यांत संवसार मांडटले, अशें बोरकार हांणी सांगलें.
तशेंच आमी नगर नियोजन खात्यांत आंदोलन करपा मेरेन मर्यादीत रावचे नात. जे नगर नियोजन मंडळाचे वांगडी आसात तांचे फाटल्यान आमी लागतले. तांच्या घरा आनी कचेर्यांनी वचून ह्या झोन बदला विशीं स्पश्टीकरण मागतले, अशी शिटकावणी बोरकार हांणी दिली.
आतां सद्या सगळे थळावे खात्याच्या कचेरे भितर बसून आसात आनी सांतेरी देवीचीं भजनां म्हणीत तांणी आपलें आंदोलन चालूच दवरलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
