भांगरभूंय | प्रतिनिधी
अॅड. वामन पंडीत: सोशल मिडिया वेलो पोस्ट फटीचो
म्हापशें: श्रीदेव बोडगेश्वर देवस्थाना वतीन देवळाच्या प्राकारांत भेट दिवपी भक्तां खातीर ‘ड्रेस कोड’ लागू केल्ल्याचो कथीत पोस्ट हो फटीचो आसून अशे तरेन देवस्थान समितीन कसलोच निर्णय घेतिल्लो ना. ताका लागून भाविकांनी अशा फटीच्या आनी दिशाभूल करपी सोशल मिडिया वेल्या संबंदीत पोस्टाचेर विस्वास दवरचो न्हय अशें आवाहन देवस्थान समितीचे अध्यक्ष अॅड. वामन पंडीत हांणी केलां.
बिरेस्तारा 19 वेर सकाळ सावन सोशल मिडियाचेर बोडगेश्वर देवळांत ड्रेस कोड लागू केल्ल्याची पोस्ट व्हायरल जाल्ली. हेविशीं उलयतना देवस्थानाच्या कार्यकारी मंडळाचे अध्यक्ष अॅड. पंडीत हांणी सांगलें, सोशल मिडियाचेर व्हायरल जाल्लो श्रीदेव बोडगेश्वर देवूळ संबंदीत पोस्ट हो फटीचो आसा. देवूळ समितीन देवळांत येवपी भाविकां खातीर ड्रेस कोडा कडेन निगडीत कसलोच निर्णय घेतिल्लो ना वा तसो थाराव कार्यकारी मंडळ समितीन घेतिल्लो ना.
तशेंच आमचे कडेन हे विशींचो कसलोच प्रस्ताव लेगीत नाशिल्लो. कोणे तरी मुद्दाम ही पोस्ट अॅडीट करून सोशल मिडियाचेर घाल्या. हे बातमेंत तथ्य नासून ताचेर कोणेच विस्वास दवरचो न्हय अशें तांणी सांगलें.
श्रीदेव बोडगेश्वर हो सगल्यांचो राखणदार. सगल्या धर्माचे लोक देवळांत दर्शना खातीर येतात. देवळांत कोणाचेरूय बंधनां नात. ताका लागून भाविकांनी अशा वावड्यांचेर विस्वास दवरचो न्हय अशें आवाहनूय अॅड. पंडीत हांणी केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
