भांगरभूंय | प्रतिनिधी
पणजी : गोंयच्या ११ अतिप्रदूशणकारी उद्देगीक युनिट्सची दर तीन म्हयन्यांनी तपासणी जाता. केंद्रीय प्रदूशण नियंत्रण बोर्डाच्या अधिकारक्षेत्रांत हे युनिट्स येतात.
केंद्रीय प्रदूशण नियंत्रण मंडळान मार्गदर्शक तत्त्वांनी सुधारणा केले उपरांत प्रदुशण करपी उद्देगीक युनिट्सची सेगीत तपासणी करप गरजेचें. गोंय राज्य प्रदूशण नियंत्रण बोर्डान ह्या उद्देगा खातीर एक देखरेख कक्ष स्थापन केलां.
नव्या नेमां प्रमाण, सामकें प्रदूशण करपी युनिट्सची तपासणी तीन म्हयन्यांतल्यान उण्यात उणी एकदां करची. आनी बोड ही प्रक्रिया पयलींच सुरू केल्या. गोंयांत हे ११ युनिट्स बेतोडा, उसगांव, पिसुर्ल्ल्यां, सांगें, कुंकळ्ळे, झुवारीनगर, आमोणा आनी खोर्ले आसात.
बोर्डाक हे विशीं २०१९ वर्सा केंद्रीय प्रदूशण नियंत्रण बोर्डाकडल्यान निर्देश जाल्ले. ते प्रमाण प्रदूशणकारी युनिट्सची पर्यावरणीय तपासणी करपाचें सुचयलां. उदक (प्रदूशण प्रतिबंध आनी नियंत्रण) कायदो, १९७४ आनी हवा (प्रदूशण प्रतिबंध आनी नियंत्रण) कायदो १९८१ प्रमाण ही तपासणी करपाचें तातूंत आसपाविल्लें.
केंद्रीय बोर्डाचे म्हायती प्रमाण, राज्य बोर्ड प्रदूशण नियंत्रण कार्यकमाच्या नियोजन आनी अंमलबजावणीक जापसालदार आसा. जाल्यार केंद्रीय बोर्ड तांकां समन्वय आनी मार्गदर्शन करता. केंद्रीय बोर्डान विवीध उद्देगांच्यो श्रेणी केल्यात. ते प्रमाण तपासणीय करता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
