भांगरभूंय | प्रतिनिधी
मडगांव : साळ न्हंयेचे नितळसाणे खातीर विस्तृत प्रकल्प अहवाल तयार केला. तो फुडल्या दोन दिसांनी सरकाराक सादर करतले. ह्या अहवालाक मंजुरी मेळटांच निविदा प्रक्रिया पुराय करून ’वर्क ऑर्डर’ काडटले आनी प्रत्यक्ष कामाक सुरवात जातली, अशी म्हायती भौशीक बांदकाम मंत्री दिगंबर कामत हांणी दिली.
खारेबांध-मडगांवच्या विवीध उदरगतीच्या कामांचें उक्तावण मंत्री कामत हांचे हस्तुकीं जालें. ह्या वेळार नगरसेवक महेश आमोणकार आनी थळावे नागरीक हाजीर आशिल्ले. खारेबांध वाठारांतल्या रस्त्यांच्या दोनूय वटेन घाणयार्या उदका खातीर गटारां बांदतले. ह्या कामा खातीर मडगांव पालिकेच्या निधींतल्यान सुमार साडेबारा लाख रुपया खर्च करतले. तशेंच कोंब वाठारांतूय बेगीनूच गटारांच्या बांदकामाचें काम हातांत घेतले अशें खर्च मंत्री कामत हांणी स्पश्ट केलें.
साळ न्हंयेच्या प्रदूशणाविशी आनी नितळसाणे विशीं उलयतना पुनरुज्जीवना खातीर सरकार पुरायेन यत्न करता. न्हंय नितळसाणेचो सविस्तर अहवाल तयार जाल्ल्यान सरकारा कडल्यान मंजुरी मेळ्ळे उपरांत फुडली तांत्रीक प्रक्रिया बेगीनूच राबयतले. तशेंच साळ न्हंयेच्या सोबितीकरणाचें काम उदकास्रोत विभागा वतीन पुराय जालां, अशेंय तांणी नमूद केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
