भांगरभूंय | प्रतिनिधी
पणजी : राज्य सरकारान ३०० मेगावॅट तांकीच्या सौर ऊर्जा प्रकल्पा वांगडा १५० मेगावॅट/९०० मेगावॅट-वराक बॅटरी ऊर्जा सांठोवपाची प्रणाली (BESS) उबारपाचो प्रस्ताव मुखार हाडला. गोंय ऊर्जा विकास एजंसीन (गेडा) हांणी प्रकल्पा खातीर निविदा मागयल्यात.
हो प्रकल्प २५ वर्सांच्या ‘बांधा-वापरात-चलयात-हस्तांतरीत (बूट) करात’ह्या तत्वाचेर राबयतले. सांजेवेळार ६ ते सकाळीं ९ ह्या वरांनी स्थिर आनी नियोजीत वीज पुरवण करपाचो गोंय वीज खात्याचो हो प्रकल्प राबोवपा फाटलो हेतू आसा. प्रकल्पाची जोडणी राज्य ट्रान्समिशन युटीलिटीच्या लागसारच्या २२० केव्ही उपकेंद्रा कडेन करतले. तशेंच ट्रान्समिशन लायन, पुलिंग सबस्टेशन आनी गरजेची ग्रीड सुधारणा करपाची जापसालदारी विकासकांचेरूच उरतली.
६५० एकर जमिनीची अट
मात, ह्या प्रकल्पा खातीर उण्यात उणी ६५० एकर जमीन गरजेची आशिल्ल्याची अट घातल्या. गोंयांत जमीन मर्यादीत आशिल्ल्यान उपलब्ध आसप कठीण आसा. हे अटीक लागूनच प्रस्नचिन्न निर्माण जालां.
निविदेच्यो पात्रता अटीय खर दवरल्यात. निविदा भरपाक इत्सूक आशिल्ल्यां कडेन उण्यात उणो १० वर्सांचो अणभव. ३०० मेगावॅट सौर प्रकलप उबारपाचो अणभव आनी १ हजार कोटी रुपयांची संपत्ती आसप बंधनकारक आसा. ५ कोटी रुपयांचो निधी (EMD आनी १५ कोटी रुपयांची बँक हमी दवरप गरजेचें. करार जाले उपरांत २४ म्हयन्यांत प्रकल्प पुराय करप अपेक्षीत आसा.
मजगतीं, फाटल्या वर्सा जुलय म्हयन्यांत एनटीपीसी रिनिवेबल एनर्जी लिमिटेडान गेडा वांगडा ३०० मेगावॅट नुतनीकरणक्षम उर्जा तांकी खातीर सामंजस्य करार केल्लो. उपरांत एनटीपीसन तत्सम सौर प्रकल्पा खातीर स्वतंत्र इपीसी निविदाय काडिल्ली.
राज्य सरकारचो नुतनीकरणक्षम ऊर्जेकडेन आशिल्लो कल स्पश्ट जरी आसलो तरी व्हड प्रमाणांतली जमनीची गरज आनी काटेकोरपणान अंमलबजावणी कालमर्यादा हाका लागून ह्या म्हत्वाच्या प्रकल्पाच्या वेव्हारा विशीं प्रस्न हाजीर येता. ऊर्जा तज्ज्ञांच्या मतान, व्हडा प्रमाणांत बॅटरी सांठोवपाचो आसपाव हो हरीत ऊर्जेक स्थैर्य दिवपी सकारात्मक निर्णय आसा; मात जमीन संपादन हीच सगल्यांत व्हड आडखळ थारपाक शकता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
