भांगरभूंय | प्रतिनिधी
जल्मा पसून गोंयांतूच आसा आनी इतलेंय आसून जर तो गोंयचो मतदार न्ही जाल्यार खंयचो मतदार तर तो?
सद्याक देशभर मतदार वळेरी तपासपाचें काम सुरू जालां. कितल्याशाच कोटी लोकांचीं नांवां मतदार वळेरेंतल्यान काडून उडयल्यांत म्हणपाचें आयकूंक येता. राहूल गांधीन व्होट चोरी जाता म्हणपाची कागाळ केली आनी ताचो परिणाम म्हणल्यार मतदार वळेरी तपासूंक घेतली. आतां कोट्यांनी लोकांचीं नांवां वगळ्ळ्यांत म्हणटकूच व्होट चोरी आरोपांत तथ्य आसा म्हणचें पडटलें. एक तर हीं नांवां बोगस आसूंक जाय वा हे लोक आमच्या देशांतले न्हय असो ताचो अर्थ जाता. पूण हें तरी खरें? काय बेठेंच आमी काम केलें म्हूण दाखोवंक कोणाचें तरी नांव काडलां तेंय तपासपाची गरज आसा. मतदार वळेरींत काय अशेंच नांव येना. तें नांव घालपाक एक प्रोसेस आसता. जो मनीस आपलें नांव वळेरेंत घाल म्हणून मागता ताची सारकी वळख जाले बगर वळेरेंत नांव वचना. आनी अशीं बोगस नांवां जर वळेरेंत आसा अशें वेंचणूक आयोग मानता जाल्यार जांणी ही प्रक्रिया करून नांवां वळरेंत घालीं तांचेर कारवाय जावप गरजेचें थारता.
हातूंत पयलो येता बिएलओ. सरकारी खात्यांनी काम करप्यांक वेंचणूक आयोग हें काम दिता. बिएलओ हो स्थानीक आसता आनी ताका पुराय वाठाराची म्हायती आसता. कोण त्या वाठारांत रावता, ताचें घर स्वताचें काय भाड्याचें, लायट, उदक कोणाच्या नांवार आसा ही सगली म्हायती ताका आसता. ताका जर दिसलें हो मनीस सारको म्हूण तरूच तो ताचो अर्ज मुखार धाडटा. बिएलओन दिल्ले म्हायतीचेर आदारून मुखा वेलें काम जाता. म्हणटकूच बिएलओच्या सहकार्या बगर मतदार वळेरेंत सहजतायेन नांव वचप कठीण. अशेंय आसून जर वळेरेंत बोगस नांवां आसात तर तीं बिएलओचीं घाळपणां म्हणचीं पडटलीं. आतां बिएलओन घाळपणां केल्यांत काय ताचेर खंयच्याय राजकर्त्यांनी चेपण हाडून हीं नांवां घालूंक लायल्यांत हाचीय वासपूस जावची पडटली. आनी तेच वांगडा हीं नांवां खरींच बोगस काय कोणाच्या चेपणा खाला तांकां बोगस थारायल्यात तेंय पळोवप गरजेचें.
हें बरोवपाचें कारण म्हणल्यार म्हाका सद्याक एक वेगळोच अणभव मेळ्ळा. हांव स्वताक नीज गोंयकार मानतां. कित्याक मानचो ना? म्हजो जल्म गोंयांत. जेन्ना गोंय पुर्तुगेजां कडेन आसलें त्या पुर्तुगेज गोंयांत हांव जल्मलों. म्हजे आवय-बापूय गोंयकार. आजे, पणजे, शेणजे सगलेच गोंयकार. म्हजें शिकप गोंयांत, काम गोंयांत आनी आतां रिटायर जालों तरी गोंयांत. इतलेंय आसून आतां आमकां आमी गोंयकार म्हणपाचें सिद्ध करचें पडटा.
तर मतदार वळेरी तपासपाचें काम सुरू जालें आनी म्हाका व्हॉट्सेपार एक मेसेज आयली. इलेक्शन कमिशनरा कडल्यान एक फॉर्म आयला मात्सो व्हरात. आनी वांगडाच फॉर्माचो फोटू. बिएलओ दारांत येवन फॉर्म दितलो म्हणपाचें खबरांनी वाचिल्लें. हांवें मेसेज धाडटल्याक विचारलें, बिएलओ लोकांच्या दारांत काय लोक बिएलओच्या दारांत? म्हाका जाप मेळ्ळी तुका सगल्याक सोदलो पूण तूं मेळच ना. हांव अजापलों. हांव तर घराच आसतां. हो केन्ना आयलो काय दारांत? विचारतकूच कळ्ळें तो म्हाका भुतेभाटांत सोदतालो. आतां हांव म्हारू वा देंवचार बी दिसलों काय कोणाक? हांवें व्हॉट्सेपा वेलो फॉर्म पळेलो. पत्तो तर सारको आसा मागीर हो म्हाका खंय सोदता तर? ताका हांवें हातांतल्या फार्मा वेलो पत्तो पळोवंक सांगलो. दुसरेच दिसा तो म्हज्या घरा आयलो. ताचे कडल्यान म्हाका कळ्ळें हांव रावता तो वाठार ताका लागना. हांव रावतां तो भाग 24 आनी ताचो भाग 26. आतां कोणाक खंयच्या वाठारांत घालप हें काय आमी थारायनात. तें काम वेंचणूक कचेरेंत बशिल्ले कर्मचारी करता. म्हजो पत्तो सारको आसा, म्हज्या मतदार कार्डार तोच आसा, मतदार वळेरेंत तोच आसा. हांव रावतां तो भाग जर चोवीस जाल्यार हांव सव्विसांत कसो पावलों?
दारांत आयिल्ल्या बिएलओन तरी आसतना म्हजें लायट बील आनी घरपटये वेलो पत्तो तपासलो. ताचे फोटूय काडले. आमचे कडल्यान फॉर्म भरून घेतलें आनी आपूण हीं नांवां 24 भागांत घालपाचें करतां म्हूण सांगून गेलो. मतदार वळेरी जाहीर जाली तेन्ना आमचें कोणाचेंच नांव तातूंत नासलें. 24, 25, 26 सगले भाग सोदले आनी निमाणें बिएलओक फोन लायलो. ताणें सांगलें, तुमचें नांव येवंक वेळ लागतलो. घडये फेब्रुवारींत नवी वळेरी येतली तातूंत येवं येता. जालें दीस गेले. फेब्रुवारी आयलो आनी म्हाका मेसेज आयली ‘तुमचें बदल करूंक मागिल्लो अर्ज आमचे कडेन पावला. दोन दिसांनी दुसरी मेसेज आयली. तुमचो अर्ज मानून घेतला. म्हजे घरकान्नीकूय तशीच मेसेज आयली. वांगडाच नव्या बिएलओचें नांवूय आयलें. आमचीं दोगांयचीं नांवां 24 भागांत आयलीं पूण पुताचें नांव येवपाचें आसलें. आमचीं आयल्यांत म्हणटकूच ताचेंय येतलें अशेंच दिशिल्लें. जाल्यार ताका मेसेज आयली तुजो अर्ज मानून घेवंक ना. एकूच उतर ‘रिजेक्टेड’. कित्याक बी कांय ना. अर्जांत कितें उणें आसा, कसलो दुकुमेंत जाय वा कोणाक मेळूंक जाय कांयच ना. म्हणजेच म्हजो पूत गोंयचो मतदार न्ही असोच अर्थ जालो ना?
जल्म गोंयांत, ल्हानाचो व्हड गोंयांत जालो, शिकलो गोंयांत, कामूय गोंयांतूच करता आनी आमचेच वांगडा रावता. कामा निमतान केन्ना गल्फाक गेलो ना, लंडनाक गेलो ना, बोटीरूय गेलो ना. जल्मा पसून गोंयांतूच आसा आनी इतलेंय आसून जर तो गोंयचो मतदार न्ही जाल्यार खंयचो मतदार तर तो? तुमची चूक दुरुस्त करात म्हूण सांगल्यार नांवूच काडप? कसलो न्याय हो? चूक तुमी करतात आनी ख्यास्त आमकां? वेंचणूक अधिकाऱ्यांनी हांगा लक्ष दिवप गरजेचें.
अभयकुमार वेलींगकार
9423884687
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
