भांगरभूंय | प्रतिनिधी
पणजी : हरमला मसाज पार्लराच्या नांवा खाला चलपी शिंदळकी वेवसाया आड ग्रामस्थांच्या आंदोलनाचे फाटभूंयेर मांद्रेंच्या दोगां पुलिसांची जिल्लो राखीव विभागांत बदली केल्या. हवालदार राजेश शिरगांवकार आनी कॉन्स्टेबल सर्वेश मांद्रेंकार अशीं तांचीं नांवां.
उत्तर गोंय पुलीस अधीक्षकां कडल्यान हे विशीं आदेश जारी केला. हरमलच्या ग्रामस्थांनी शेनवारा पुलीस आनी पंचायतीक निवेदन दिवन हरमला सुरू आशिल्ल्या शिंदळकी वेवसाय आनी अनैतीक वेवसायाचेर कारवाय करपाची मागणी केल्ली.
सोमारा रातीं हरमला मसाज पार्लरच्या नांवा खाला सुरू आशिल्ल्या शिंदळकी वेवसाया आड थळाव्यांनी धडक कारवाय करीत ८ चलयांची सुटका करून तांकां मांद्रें पुलिसांचे सुवादीन केल्लें. तशेंच ह्या अनैतीक वेवसाया कडेन आडनदर करपी पुलिसांचेरूय कारवाय करपाची मागणी केल्ली. पुलीस शिंदळकी वेवसायाचेर कारवाय करिनाशिल्ल्यान थळाव्यांनी तिडक उक्तायल्ली. ताका लागून ही कारवाय केल्ल्याचें समजता.
हरमलकारांचे धडक कारवाये उपरांत मांद्रें पुलिसांनी फाटल्या ४८ वरांनी घाल्ल्या दोन धाडींत १३ चलयो आनी दोन दलालांक ताब्यांत घेवन कारवाय केल्ली. हे कारवायेचेर थळाव्यांनी समाधान उक्तायलें.
अनैतीक वेवसाय प्रकरणांतले मुखेल सुत्रधार ओगीच आशिल्ल्यान तांचेर कारवाय करपाची ग्रामस्थांची मागणी आसा. शिंदळकी वेवसायाचो मुखेल सुत्रधार मांद्रें दर्यादेगेर हेर वेवसाय चलयता. ताचेर कारवाय करपाची मागणीय ग्रामस्थांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
