गोंयची कामगिरी हेर राज्यांक उर्बा दिवपी

भांगरभूंय | प्रतिनिधी

‘हर घर जल’ येवजण 100 टक्के पुराय, प्रधानमंत्र्यांचीं परबीं

भांगरभूंय I प्रतिनिधी
पणजी : ‘हर घर जल’ येवजण 100 टक्के येसस्वी करपी गोंय हें पयलें राज्य आसा. गोंयची कामगिरी हेर राज्यांक उर्बा दिवपी आसा. आतां हेर राज्यां लेगीत ही येवजण 100 टक्के येसस्वी करतली, असो विस्वास प्रधानमंत्री नरेंद्र मोदी हांणी उक्तायलो.

मिनेझीस ब्रागांझा सभाघरांत ‘हर घर जल उत्सव’ कार्यावळ जाली. हे कार्यावळीक प्रधानमंत्र्यांनी व्हर्च्युअल पद्दतीन संबोधीत केले. उदकाचीं बिलां फारीक करपा खातीर क्यू आर कोडाचो ह्या वेळार शुभारंभ जालो. केंद्रीय जलशक्ती मंत्री गजेंद्रसिंह शेखावत, मुख्यमंत्री डॉ. प्रमोद सावंत, भौशीक बांदकाम खात्याचे मंत्री निलेश काब्राल, उदका पुरवण खात्याचे मंत्री सुभाष शिरोडकार हे कार्यावळीक हाजीर आशिल्ले.
गोंया सयत दमण, दीव, दादरा नगर हवेली ह्या केंद्रशासीत वाठारानी ‘हर घर जल’ येवजण 100 टक्के पुराय केल्या. गोंयचे मुख्यमंत्री, सरकारी खातीं आनी लोकांक हांव परबीं दितां, अशें प्रधानमंत्री मोदी हांणी म्हणलें.
येवपी काळांत हेर राज्यां ही येवजण 100 टक्के पुराय करतली. जल जीवन मोहिमे उपरांत तीन वर्सांत 7 कोटी घरांक नळांतल्यान उदक मेळ्ळें. पयल्या 70 वर्सांत फक्त 3 कोटी घरांक नळांतल्यान उदक मेळिल्लें. हे येवजणेचेर आतां मेरेन 3 लाख 60 हजार कोटी रुपया खर्च जाल्यात. उदकाची सुरक्षा हे 21व्या शेंकड्यांत आव्हान थारतलें. फाटलीं आठ वर्सां उदका सुरक्षे खातीर केंद्र सरकाराचो वावर सुरू आसा, अशें प्रधानमंत्र्यांनी सांगलें.
2024 मेरेन सगल्यांक नितळ उदक दिवपाचें उद्दिश्ट आसा, अशें केंद्रीय जलशक्ती मंत्री गजेंद्रसिंह हांणी सांगलें.
उक्ताडार शौच बंदी (ओडीएफ) जाल्ले गोंय पयलें राज्य आसा. आतां ‘हर घर नल’ येवजणेंत लेगीत गोंयान पयली सुवात मेळयल्या. उदका बिलांतल्यान सगल्यांत चड येणावळ घेवपी गोंय हें पयलें राज्य जातलें. ते भायर कोयर वेवस्थापन, जैव वैजकी कोयराचे वेवस्थापन, बांदकाम कोयराचे वेवस्थापन करपी गोंय हें पयलें राज्य जातले, असो विस्वास मुख्यमंत्री डॉ. प्रमोद सावंत हांणी उक्तायलो. भौशीक बांदकाम खातें तशेंच उदका पुरवण खात्याचे अभियंते, कर्मचारी हांकां लागून ही येवजण येसस्वी जाली. संतुळीत उदरगत मानांकनांत गोंय पयलीं सातवे सुवातेर आशिल्लें. आतां ते चवथें सुवातेर पावलां.
प्रधानमंत्री नरेंद्र मोदी हांणी आत्मनिर्भर भारत येवजण सुरू केली. आत्मनिर्भर भारत तशेंच स्वयंपूर्ण गोंय मोहिमेक लागून ‘हर घर जल’ येवजण 100 टक्के पुराय जावपाक मजत जाली. उदरगती खातीर उदकाची गरज आसा. उदकाचें वेवस्थापन ही काळाची गरज आसा. हाचे खातीर जल भागीदारी संकल्पना राबोवपाची गरज आसा, अशें मुख्यमंत्री डॉ. प्रमोद सावंत हांणी सांगलें.

स्वयंपूर्ण इश्ट, लोकांक स्रयः मुख्यमंत्री

मुख्यमंत्री डॉ. प्रमोद सावंत हांणी ‘हर घर जल’ मोहिमेंत गोंयान मेळयिल्ल्या येसा खातीर स्वयंपूर्ण इश्ट, सरपंच, पंच, सगले सरकारी खात्यांचे अधिकारी, कर्मचारी तशेंच हे मोहिमेंत सहकार्य केल्ले खातीर पुराय लोकांचे उपकार मानल्यात.
एलन लोबो ह्या तरणाट्यान राज्यांतल्या सगल्या उदका स्रोतांचें क्यूआर कोड एकठांय केल्ले खातीर मुख्यमंत्र्यांन ताचीय तोखणाय केल्या.
कोयर वेवस्थापनांत गोंय देशांत आघाडेर आसा. ते भायर शाश्वत विकासांत गोंय सातवे सुवाते वयल्यान चवथे सुवातेर पावलां.
फाटल्या 50 वर्सांत जावंक नाशिल्ल्यो मुळाव्यो सुविधा फाटल्या कांय वर्सांत राज्यान उबारल्यात, अशेंय मुख्यमंत्र्यान नमूद केलें.

उदकाचें बील फारीक करपाक क्यूआर कोड
घर बसल्या उदकाचें बील फारीक करपाक सरकारान तयार केल्ल्या क्यूआर कोडाचे लोकार्पण मुख्यमंत्री डॉ. प्रमोद सावंत आनी केंद्रीय मंत्री शेखावत हांचे हस्तुकीं जालें. उदकाचें बील फारीक करपाक अशा प्रकाराची सेवा दिवपी गोंय देशांतलें पयलें राज्य जाल्ल्याचे मुख्यमंत्र्यान सांगलें.