भांगरभूंय | प्रतिनिधी
हाचे मुखार टेबलटेनिसूच न्हय, तर बॅडमिंटन, किक्रेटूय एकठांय खेळटले
भांगरभूंय।प्रतिनिधी
पणजी : मुख्यमंत्री डॉ. प्रमोद सावंत आनी हांव एकठांय आसात. पक्षा खातीर एकठांय रावोन आमी वावर करतात. मुख्यमंत्र्यां सकयल हांव नंबर दोनचो मंत्री आसा, अशें स्पश्ट करतना हाचे मुखार आमी बॅडमिंटन वा क्रिकेट लेगीत एकठांय खेळपाची शक्यताय नगरनियोजन मंत्री विश्वजित राणे हांणी उक्तायल्या.
पणजे मिरामार कार्यालयांत पत्रकार परिशदेंत उलयताना मंत्री विश्वजित राणे हांणी ही गजाल स्पश्ट केली. बोंडवेल तळ्याचो विशय घेवन सांताक्रुजचे ग्रामस्थ नगरनियोजन मंत्री विश्वजित राणे हांकां मेळपाक आयिल्ले. ग्रामस्थांकडेन चर्चा केले उपरांत चर्चेची म्हायती दितना राणे हांणी हे वक्तव्य केले.
मुख्यमंत्री आनी हांव टेबल टेनिस खेळता आसतानाचो व्हिडियो व्हायरल जालो. टेबलटेनिसूच न्हय तर हाचे मुखार आमी बॅडमिंटन, किक्रेटूय एकठांय खेळप शक्य आसा. आमी एकठांय ना, असो एक समज आसा. मुख्यमंत्री आनी हांव पक्ष तशेंच लोकां खातीर वावर करतात. जो कितें निर्णय हांव घेता, तो हांव सरकार मुखेल ह्या नात्यान मुख्यमंत्र्यांक कळयतां. आमचो दोगांचो हेत आनी व्हिजन एकूच आसा. पक्षाक परतून सत्तेर हाडपा खातीर आमी एकठांय वावुरतले, अशें नगरनियोजन मंत्री विश्वजित राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
