भांगरभूंय | प्रतिनिधी
दक्षीण गोंय खासदार विरीयातो फर्नांडीस हांचो दावो
भांगरभूंय । प्रतिनिधी
पणजीः ऑपरेशन सिंदूर उपरांत सुरक्षेचें कारण दित दाबोळी विमानतळ नागरी उड्डाणा खातीर बंद करपाची फायल संरक्षण मंत्रालयान तयार केल्ली. हे विशीं गोपां कडल्यान म्हायती मेळ्ळे उपरांत संरक्षण मंत्र्याक पत्र बरयलें. मागीर हे फायलीक स्थगिती दिली. पूण भितरल्यान हो विमानतळ बंद उडोवपाचो डाव अजून चालू आसा असो आरोप दक्षीण गोंय खासदार कॅ. विरीयातो फर्नांडीस हांणी केलो.
पणजे काँग्रेस हावजांत जाल्ले पत्रकार परिशदेत कॅ. विरीयातो उलयताले. ह्या वेळार दक्षीण गोंय काँग्रेस अध्यक्ष सावियो आल्मेदा, उत्तर गोंय काँग्रेस अध्यक्ष विरेंद्र शिरोडकार हाजीर आशिल्लें.
दाबोळी विमानतळ हो पुर्तेगेज तेपा सावन अस्तिवांत आसा आनी गोंय मुक्त जाले उपरांत ताचो वापर सैन्या खातीर जावपाक लागलो, अशें फर्नांडीस हांणी सांगलें.
आंध्र प्रदेशांतली कंपनी जीएमआर मोपा विमानतळ हातळटा आनी हेच कंपनीचो हैदाराबादांत राजीव गांधी विमानतळ लेगीत आसा. पूण हो विमानतळ चलोवपाक घेवचे पयली ह्या विमानतळा लागसार एकूय विमानतळ आसपाक जायना अशी अट दवरिल्ली. हे अटीक लागून लागीच आशिल्लो बरो चलपी विमानतळ बंद केलो असो दावो फर्नांडीस हांणी केलो.
फाटली तीन वर्सा जाली मोपा विमानतळ 266 कोटी लुकसाणांत चलता आनी हो आंकडो तांचे बॅलन्स शींटांतल्यांनूच आयला. तांकां ह्या लुकसाणांतल्यान भायर काडपा खातीर दाबोळी विमानतळ बंद उडोवपाचे शडयंत्र चल्ला, असो आरोप विरीयातो हांणी करून हे विमानतळ बंद उडोवपा फाटल्यान दोन शडयंत्रा कशी चल्ली हाची म्हायती दिली.
दाबोळी विमानतळा लागसार उड्डाण पुल बांदपाचे काम हातांत घेतिल्ले. पूण ह्या उड्डाण पुला खातीर नौदळाची परवानगी घेतल्या काय ना असो प्रश्न हांवेन राष्ट्रीय महामार्गाच्या अधिकाऱ्यांक केले उपरांत केंद्र सरकाराच्या कामांक नौदळाची परवानगी लागना अशी जाप तांणी दिली. पूण परवानगी घेवपा खातीर नौदळान राष्ट्रीय महामार्गाच्या अधिकाऱ्यांक चार नोटीसी धाडिल्ल्यो, अशें फर्नांडीस हांणी म्हणलें.
पूण ह्या फ्लायओव्हरा आड लोक न्यायालयांत गेले उपरांत राष्ट्रीय म्हार्मागाच्या अधिकाऱ्यांक नौदळाची परवानगी घेवपाचो आदेश दिलो. परवानगी वेळार दिसून आयले, जे खांबे उड्डाण पुला खातीर बांदिल्ले ते विमानातळच्या पातळे वेल्यान खूब उंच आशिल्ले. पुल जाले उपरांत व्हडल्या विमानाक देंवपाक अडचण जावन फक्त नौदळाचे फायटर विमान देंवपाक शकतले. हो विमानतळ बंद उडोवपाक सरकारान फ्लायओव्हराचे शडयंत्र चलयले, असो आरोप विरीयातो हांणी केलो.
जेन्ना हांव संसदेत आसलो तेन्ना म्हजे गोपा वांगडा चवकशी सुरू केली तेन्ना कळून आयले, ऑपरेशन सिंदूर उपरांत सुरक्षेच्या कारणाक लागून दाबोळी विमानतळ बंद करपा खातीर फायल मंजूर जाल्ली. हे कळ्ळे उपरांत हांवेन संरक्षण मंत्र्याक पत्र बरोवन विचारले चीन-पाकिस्तान शिमेवेले सगळे विमानतळ नागरी उड्डाणा खातीर चालू आसतना फकत गोंयात कसलो सुरक्षेचे प्रश्न येता? तेन्ना हे फायलीक स्थगिती दिली अशें कळ्ळे अशें फर्नांडीस हांणी म्हणलें.
पूण भितरल्यान हो विमानतळ बंद उडोवपाचो डाव अजून चालू आसा. संरक्षण मंत्री राजनाथ सिंह गोंयां आयिल्ले तेन्ना मुख्यमंत्री डॉ. प्रमोद सावंत आनी थळावे आमदार तशेंच मंत्री मावीन गुदिन्हो सिंह हांकां मेळ्ळे आनी दाबोळी बंद पडचो ना अशें आश्वासन सिंह हांणी दिल्ल्याचे सांगलें. 15 दिसा उपरांत परत तांणी दिल्ली सिंह हांची भेट घेवन हीच काणी परत सांगली आनी तिसरे खेपे मावीन हे एकटेच सिंह हांका मेळ्ळे. जर पयलेच खेपे आश्वासन दिल्ले जाल्यार तीन खेपे भेट कित्याक दिवपाक जाय आसली, असो प्रश्न फर्नांडीस हांणी विचारलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
