गोंयांत महाशिवरातीच्या निमतान 500 जणांनी केलो परतून हिंदू धर्मात प्रवेश
भांगरभूंय | प्रतिनिधी
पोरणें गोंयां श्री गोवेश्वर महाशिव देवळांत जालो भव्य धर्मीक सुवाळो
पणजीः महाशिवरातीच्या शुभ निमतान पोरणें गोंयांतल्या श्री गोवेश्वर महाशिव देवळांत भव्य धर्मीक सुवाळो जालो. ह्या सुवाळ्या वेळार सुमार 500 लोकांनी हिंदू धर्मांत परतून प्रवेश केल्ल्याची म्हायती आयोजकांनी दिली. ह्या कार्यावळींत जगद्गुरु रामानंदाचार्य नरेंद्रचार्यजी महाराज हांच्या हाजिरेंत धर्मीक विधी जाल्यो. ह्या निमतान आखाडा परिशदेचे मुखेल साधुसंत आनी महंतांच्या साक्षीन वेदपठण, हवन आनी पारंपारीक हिंदू विधी जाल्यो.
श्री गोवेश्वर महाशिव देवळांत प्राणप्रतिष्ठा सुवाळोय आयोजीत केल्लो. हे कार्यावळीक मुख्यमंत्री डॉ. प्रमोद सावंत हाजीर आशिल्ले. आयोजकांनी दिल्ले म्हायती प्रमाण, सुमार 300 लोकांनी ‘घरवापसी’ केली, जाल्यार हेर 200 लोकांनी हिंदू धर्म आपणायलो आनी हो आंकडो 500 जालो. ह्या सुवाळ्या खातीर देशभरांतल्या वेगवेगळ्या अखाड्यांतले संत आनी-महंत हाजीर आशिल्ले.
आतां मेरेन 1.63 लाख लोकांचो हिंदू धर्मांत प्रवेश
मजगतीं, जगद्गुरु रामानंदाचार्य नरेंद्रचार्यजी महाराज हांणी आतां मेरेन 1 लाख 63 हजार 643 लोकांक परतून हिंदू धर्मांत प्रवेश दिला अशी म्हायती आयोजकांनी दिली. आनी फुडाराकय हें काम चालूच उरतलें अशें स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
