भांगरभूंय | प्रतिनिधी
नवी दिल्ली, खबरां संस्थाः देशांतल्या नागरिकांक 2025 वर्सा 4 हजार कोटी परस चड स्पॅम कॉल आयले. तातूंतले 1 हजार 189 कोटी गरजे भायर आशिल्ले कॉल्स वापरप्यां मेरेन पावचे पयलींच ब्लॉक केले. हाका लागून कोटी नागरिकांची फटवणूक जावपा पसून आनी तांचो वेळ फुकट वचपा पसून आडावंक मजत जाली. ट्रूकाॅलराच्या अहवालांतल्यान ही म्हायती मेळ्ळी.
देशांत 100 कोटी परस चड मोबायल वापरपी आसात. स्पॅम आनी फटवणूक प्रकारा संबंदी ट्रूकाॅलरान अहवाल जाहीर केला. तातूंत डेटा आदारीत विश्लेशणा वरवीं स्पॅम आनी फटवणूक प्रकार देशांतल्या संचारण प्रणालीचेर कसो परिणाम करता आनी तंत्रगिन्यान दर दिसा कोट्यांनी नागरिकांची कशी राखण करता हें सादर करता. ह्या अहवाला प्रमाण ट्रूकाॅलरान 2025 वर्सा देशांत 4 हजार 168 कोटी स्पॅम कॉल वळखून घेतल्यात. तातूंतले 1 हजार 189 कोटी कॉल वापरप्यांनी आडायले. तशेंच बँको, सरकारी संस्था आनी नामनेच्या ब्रँडांची नक्कल करून केल्ले 770 कोटी फटीचे कॉल सोदून काडले. फाटल्या वर्सांत 12 हजार 903 कोटी स्पॅम शॉर्ट मेसेज (एसएमएस) सोदून काडले.
स्पॅम कॉल आडावपा खातीर ट्रूकाॅलरा ‘कम्युनिटी रिपोर्टिंग’ वरवीं वापरप्यांची मजत मागता. हाचे वरवीं 1,189 कोटी स्पॅम कॉल वापरप्यां मेरेन पावचे पयलींच आडायले. एका कॉलाचो सरासरी वेळ 1.8 मिनटांचो आसून स्पॅम कॉल ब्लॉक केल्ल्यान भारतीयांची दिसाक सुमार 21.7 लाख वरां आनी सप्तकांतल्यान 1.5 कोटी वरां परस चड वेळ वाचलो.
2026 वर्सा ह्या गजालीं पसून धोको…
वळख सत्यापन करपाच्या नांवान जावपी फटवणूक
फटीचो सरकारी वेबसायटी पसून जावपी फटवणूक
कॉल, संदेश आदारीत बहुस्तरीय स्कॅम
एआय-निर्मित व्हॉयस संदेश
ऑनलायन फटवणूक ही फकत तंत्रीक समस्या न्हय, तर मनशाच्या वागणुके कडेन संबंदीत समस्या आसा. वापरप्यांचो भंय, उतावळ आनी अनिश्चिततायेचो फायदो फटोवपी घेतात. वापरप्यांनी सादूर रावचें अशें ट्रूकाॅलराचे मुखेल कार्यकारी अधिकारी रिशित झुनझुनवाला हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
