भांगरभूंय | प्रतिनिधी
दामू नायक हांणी जैताचें स्रय दिलें समर्पीत कार्यकर्त्यांक
गोंय भेटीर आयिल्ल्या 11 नगरसेवकांचो पणजे सत्कार
डबल इंजीन सरकाराचीं कामां केरळा खातीर थारतलीं फायद्याचीं
भांगरभूंय । प्रतिनिधी
पणजी : केरळांतल्या त्रिवेंद्रम म्हापालिकेंत 46 वर्सांनी भाजपाक जैत मैळ्ळां. थंय 101 मदल्या 50 सुवातांचेर भाजपा उमेदवार जिखल्यात. समर्पीत भाजप कार्यकर्त्यांक लागून हें शक्य जालां, अशें भाजप प्रदेशाध्यक्ष दामू नायक हांणी सांगलें.
शेनवारा 11 नगरसेवकांचो भाजपाच्या पणजेच्या कार्यालयांत सत्कार केलो. ह्या वेळार नगरविकास मंत्री विश्वजीत राणे, महापौर रोहीत मोन्सेसात आनी हेर पदाधिकारी हाजीर आशिल्ले.
दामू नायक हांणी सांगलें, केरळांत भाजप कार्यकर्त्यांनी फाटलीं कितलीशींच वर्सां मेहनत केल्या. थंयच्या साम्यवादी विचारांच्या पक्षा वांगडा लडो दिवप कठीण काम. अशें आसलें तरीय 9 डिसेंबर 2025 ह्या दिसा जाल्ले त्रिवेंद्रम म्हापालिका वेंचणुकेंत भाजपाक भोवमत मेळ्ळें. आमच्या कार्यकर्त्यांनी एकवट, सामर्थ आनी त्यागाच्या बळाचेर आमकां हें येस मेळोवन दिलां. हें येस प्रधानमंत्री नरेंद्र मोदी आनी केरळ प्रदेशाध्यक्ष राजीव चंद्रशेखर हांच्या यत्नांक लागून शक्य जालां. केरळांतले जिखिल्ले नगरसेवक भाजप शासीत विवीध राज्यांक भेट दितात. हाचोच एक भाग म्हूण 11 नगरसेवक दोन दिसांचे गोंय भोंवडेर आयल्यात. हे मजगतीं, ते मुख्यमंत्री डॉ. प्रमोद सावंत हांची भेट घेतले. तशेंच पणजी म्हानगरपालिका आनी हेर खात्यांक भेट दितले. ताकां स्मार्ट सिटी खाला जाल्लीं कामां दाखयतले. तशेंच भाजपाच्या डबल इंजीन सरकारान केल्लीं उदरगतीचीं कामां लेगीत दाखयतले. विकसीत भारत, विकसीत केरळा खातीर ह्यो गजाली फायद्याच्यो थारतल्यो, अशें दामू नायक हांणी सांगलें.
‘त्रिवेंद्रमांत जिखप ही अभिमानाची गजाल’
त्रिवेंद्रम म्हापालिकेंत भाजप जिखप ही आमचे खातीर अभिमानाची गजाल आसा. हे मजगतीं जैतवंत नगरसेवकांक विकसीत भारत 2047 विशीं सादरीकरण दाखयतले. तांकां गोंयांत नगरविकास तशेंच हेर मळांचेर मुळाव्यो सुविधा कश्यो निर्माण केल्यात, हाचीय म्हायती दितले, अशें मंत्री विश्वजीत राणे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
