भांगरभूंय | प्रतिनिधी
टॅरीफाक लागून सध्या निर्गत बंद
भांगरभूंय । समीप नार्वेंकार
पणजी : गोंयांतल्यान फाटल्या पांच वर्सांत 19 हजार मॅट्रीक टन सुंगटांची निर्गत अमेरिकेत जाल्या. पूण हालींट अमेरिकेन भारताचेर टॅरीफ वाडयिल्ल्यान ही आयात फाटल्या एक वर्सांत खूब उणी जावन आतां गोंयांतल्यान निर्गत सामकीच बंद जाल्या, अशी म्हायती वाणिज्य आनी उद्देग मंत्रालयान दिल्या.
मंत्रालयान समुद्री उत्पन्न निर्गत उदरगत प्राधिकरणाचो (एमपीईडीए) जारी केल्ल्या अहवालांत ही आंकडेवारी जारी केल्या. 2020-21 ते 2024-25 मजगतीं गोंयांतल्यान 19,279 मॅट्रीक टन इतली गोठयल्ल्या सुंगटांची अमेरिकेंत निर्गत जाल्या. ह्या सुंगटांक 114 मिलियन डॉलर्स म्हणल्यार 882 कोटी रुपयांचें मोल आयलां. वर्साक सरासरी हीं सुंगटां 400 ते 500 रुपया दर कील ह्या दरान विकल्यात.
पुराय देशभरांतल्यान 34,87,030 मॅट्रीक टन इतली गोठयल्ल्या सुंगटांची निर्गत जाल्या आनी हातूंत गोंयचो फक्त 0.55 टक्के इतलो वांटो आसा. गुजरात, महाराष्ट्र, गोंय, कर्नाटक, केरळ, तामीळनाडू, आंधप्रदेश, तेलंगणा, ओडिशा, अस्तंत बंगाल आनी दिल्ली ह्या राज्यांतल्यान सुंगटांची निर्गत जाता. अमेरिकेक सुंगटांची निर्गत करपात गोंय हें धावे सुवातेर आसा जाल्यार सगल्यांत निमाणे सुवातेर दिल्ली हें 11वे सुवातेर आसा.
गोंयांत 2021-22 ते 2023-24 मजगतीं अमेरिकेक सुंगटांचे निर्गतेंत सेगीत वाड नोंद जाल्ली. 2021-22सात 3 हजार मॅट्रीक टना वयल्यान ही वाड 2023-24त 5 हजार मेरेन वाडली. उपरांत भारत आनी अमेरिके मदीं टॅरीफ घेर्र पेटलें आनी वाडिल्ल्या टॅरीफाक लागून गोंयांतल्यान जावपी सुंगटाची निर्गत 1 हजार मॅट्रीक टन मेरेन उणी जाली. वाडीव टॅरीफाक लागून 11 मदल्या 8 राज्यांतल्यान अमेरिकेक सुंगटाची निर्गत जावपाक लागली. ऑगस्ट ते डिसेंबर 2024 आनी ऑगस्ट ते डिसेंबर 2025 ह्या काळांत गोंया सावन अमेरिकेक सुंगटाची निर्गत सामकीच बंद जाली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
