भांगरभूंय | प्रतिनिधी
पणजी : अंदूच्या महानगरपालिकेच्या कार्यकाळांत आमी जायतीं उदरगतीची कामां केल्यात. आदल्या खंयच्याय महापालिका मंडळा परस आमी चड काम केलां. हाका लागून विरोधकांक वेंचणुके खातीर कसलेच मुद्दे मेळनात. देखूनच निमाण्या धा दिसांत विरोधी पक्ष सक्रीय जावन वैयक्तीक टिका करपाचें राजकारण करतात अशें महापौर रोहित मोन्सेरात हांणी सांगलें. शेनवारा तांणी प्रसार माध्यमां कडेन संवाद सादलो.
पावसाच्या दिसांनी पणजेंत जावपी हुंवाराची परिस्थिती बंद जावप शक्य ना अशें सगळ्यांक दिसताले. फाटल्या 3 वर्सां सावन आमी हुंवाराची परिस्थिती नियंत्रणांत हाडल्या. आमच्या बऱ्या वावराक लागून राष्ट्रपतींच्या हस्तुकीं आमचो भोवमान जालो. फाटलीं पांच वर्सां विरोधकांनी कांयच केल्लें ना. वेंचणूक येतकच ते जागे जाल्यात. ते लोकांक भावनीक करून मत मागतात. आमी हाचे पयलीं रस्त्यांचेर देंवून कामां केल्यात आनी ह्यान फुडेंय करतले.
वेंचणुके खातीर संभाव्य उमेदवारांची वळेरी तयार केल्या. आमी नव्या उमेदवारांक वेंचणूक लढोवपाक प्रोत्साहन दिलां. मतदारसंघ आरक्षणाचो विचार करून अंदूं नव्या उमेदवारांक संद दितले. हीं नांवां बेगीनूच जाहीर करतले. आचारसंहिता चालीक लागू जाले उपरांत अधिकृत कॅम्पेन सुरू जातले. ताचे आदीं आमी निमाणे दिसा मेरेन लोकांचे प्रस्न सोडोवपाचो यत्न करतात.
कॅसिनोक म्हजो वैयक्तीक खर विरोध आसा. पूण कॅसिनोंक लागून थळाव्यांक रोजगार आनी वेवसाय मेळटा. विरोधकांनी पयलीं पर्यायी रोजगाराचो मार्ग सांगचो. 12 फेब्रुवारीक महापालिका बसका जावची ना हें हांवें सगळ्यांक कळयिल्लें. तरी लेगीत वाल्मीकी नायक हांणी ज्येश्ठ नागरिकांक फटोवन महापालिकेत हाडलें अशें महापौररोहित मोन्सेरात हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
