भांगरभूंय | प्रतिनिधी
पणजीः सांगोल्ड्यां हॉटेलाच्या स्विमिंग पुलांत उडी मारले उपरांत अजय पलिक्कल (23, केरळ) हो पर्यटक गंभीर जखमी जाल्लो. उपरांत ताका लागसारच्या हॉस्पिटलांत उपचारा खातीर व्हेलो. आनी फुडल्या उपचारा खातीर जीएमसींत धाडलो. पूण थंय उपचार सुरु आसतना ताका मरण आयलें.
शुक्रारा सांजवेळार ही घडणूक घडली. न्हावपा खातीर स्विमिंग पुलांत उडी मारले उपरांत तरणाट्याच्या नाकाक जखम जाली आनी तो जखमी जालो. पुलांतल्यान भायर येतकच ताका अस्वस्थ जावणवपाक लागले. उपरांत ताका लागसारच्या खाजगी हॉस्पिटलांत व्हेलो. ताची भलायकी गंभीर आशिल्ल्यान ताका जीएमसींत धाडलो. पूण उपचारा मजगतीं काल रातीं ताका मरण आयलें. केरळांतल्या 35 पर्यटकांचो एक पंगड शुक्रारा सांगोल्डा हांगाच्या एका हॉटेलांत देंविल्लो. तातूंत अजय पुलीक्कल हांचो आस्पाव आशिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
