भांगरभूंय | प्रतिनिधी
वॉशिंग्टन: अमेरिका मध्य आखातांत आपली लश्करी उपस्थिती वाडयत आसा. अमेरिका आपली सगळ्यांत व्हडली बोट, अणुशक्तीचेर चलपी यूएसएस जेराल्ड आर. फोर्ड थंय धाडटा.
अमेरिका आनी इराण हांचे मदीं तणाव वाडत आशिल्ल्यान हें पावल उबारलां. जेराल्डाक आखातांत पावपाक एक सप्तक लागतलें अशें अधिकाऱ्यांनी सांगलें. थंय अब्राहम लिंकन विमानवाहू बोट आनी हेर झुजारी बोटी पयलींच तैनात आसात.
अमेरिकेच्या नौदला कडेन फकत वट्ट 11 विमानवाहू बोटी आसात. देखून हीं खूब मोलादीक साधनां आसून तांचे तैनात करपाचें वेळापत्रक पयलींच थारायलां.
फाटल्या वर्सा जूनांत इराणाच्या अणुकेंद्रीय सुवातींचेर जाल्ल्या हल्ल्या वेळार अमेरिकेच्यो दोन विमानवाहू बोटी ह्या वाठारांत आशिल्लीं. इराणा कडेन कबलात जाली ना जाल्यार आनीक एक बोट धाडपाचो विचार करतात अशें राष्ट्राध्यक्ष डोनाल्ड ट्रम्प हांणी ह्या सप्तकांत सांगिल्लें. फुडल्या म्हयन्यांत इराणा कडेन कबलात जावंक शकता, नाजाल्यार परिस्थिती सामकी गंभीर आनी वेदनादायक जावंक शकता अशेंय तांणी सांगलें.
इराणाक 4 अटी
ट्रम्प हांणी फेब्रुवारीचे सुरवेक एके वेगळे मुलाखतींत सांगिल्लें, इराणा बरोबरची परिस्थिती आतां बदलत आसा. आतां इराण चर्चा करपा खातीर तयार जावंक शकता असो दावो तांणी केल्लो. अमेरिकेच्या एका वरिश्ठ अधिकाऱ्यान पत्रकारां कडेन उलयतना सांगलें, अमेरिका चर्चा करपा खातीर तयार आसा. इराणान संपर्क केलो आनी अटी मान्य केल्यार मागीर उलोवणी जातली. ह्या म्हयन्यांत अमेरिकेचो खाशेलो दूत स्टीव्ह विटकॉफ हांणी ह्या कबलाती खातीर अटी सांगल्यात:
० युरेनियम संवर्धनाचेर पुराय बंदी
० पयलींच संवर्धित जाल्लें युरेनियम काडप
० लांब अंतराचेर वचपी क्षेपणास्त्रांचो आंकडो मर्यादीत करप
० प्रादेशिक प्रॉक्सी दळांक मजत करप बंद करप.
युरेनियम संवर्धन थांबवपाच्या अमेरिकेच्या मागण्यांक जाप दितना इराणान 8 फेब्रुवारीक सांगिल्लें, लश्करी धमकी मेळ्ळी वा नवे निर्बंध घाले तरी खंयचेच परिस्थितींत ही कार्यावळ सोडचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
