भांगरभूंय | प्रतिनिधी
अर्थसंकल्पाविशीं मुख्यमंत्र्यांनी घेतली खात्यांच्या मुखेलींची बसका
पणजी : केंद्रीय अर्थसंकल्पाचो नियाळ घेवपा सयत राज्याच्या अर्थसंकचे तयारे खातीर मुख्यमंत्री डॉ. प्रमोद सावंत हांणी शुक्रारा खात्यांच्या मुखेलींची बसका घेतली. विवीध खात्यांमदीं समन्वय सादपा खातीर सचिवांची नेमणूक केल्ल्याची म्हायती मुख्यमंत्री डॉ. प्रमोद सावंत हांणी दिली.
राज्याचें अर्थसंकल्पी अधिवेशन ६ मार्च ते २७ मार्च मेरेन जातलें. मुख्यमंत्री डॉ. प्रमोद सावंत हे पयलेच दिसा म्हळ्यारे ६ मार्चाक अर्थसंकल्प सादर करपाची शक्यताय आसा. मात अधिवेशनाची कार्यावळ थारोपा खातीर कामकाज सल्लागार समितीची बसका आजून जावपाची आसा. अर्थसंकल्पाची तयारी मात नेटान सुरू आसा. केंद्रीय अर्थसंकल्पाच्या धर्तीचेर गोंयचो अर्थसंकल्प आसतलो. केंद्रा कडल्यान राज्याक कितलो निधी मेळटलो ते प्रमाण तरेकवार खात्यां खातीर निधीची तजवीज जातली. हाचे खातीर केंद्रीय अर्थसंकल्पातल्यो येवजण्यो तशेंच निधीचो नियाळ जालो. भौशीक बांदकाम खातें, वीज खातें, पेयजल खातें अशा विवीध खात्यांचो एकमेका कडेन संबंद येता. येवजण्यो वा निधीची तजवीज करतना हाचो विचार करचो पडटा. हाका लागून अर्थसंकल्पा खातीर विवीध खात्यांमदीं समन्वय सादपाचेर विचार विनिमय जालो. समन्वय सादपा खातीर सचिवांच्यो नेमणुको जाल्या.
अर्थसंकल्पी अधिवेशन १४ दिसांचें आसतलें. अधिवेशनाचो कालावदी उणो आशिल्ल्यान चर्चेक फावो ते प्रमाणात वेळ मेळचो ना, अशी टीका विरोधी पक्षांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
