भांगरभूंय | प्रतिनिधी
पणजी : राज्य सरकारा वतीन १६ वर्सां सकयल्या भुरग्यांक सोशल मीडियाचेर बंदी हाडपा विशीं विचार सुरू आसा. हे विशीं शिक्षक, पालक, तज्ञ तशेंच हेरांचीं मतां लक्षांत घेवनूच निमाणो निर्णय घेतले. हो विशय केंद्राचे अखत्यारींत आसा. हाका लागून दिल्लीक वचून केंद्रीय आयटी मंत्र्यां वांगडाय चर्चा करतले अशें आयटी मंत्री रोहन खंवटे हांणी सांगलें.
सोशल मिडियाक लागून भुरग्यांचें लक्ष विचलीत जाता. अशे प्लॅटफॉर्म भुरग्यांच्या मानसीक, समाजीक सुरक्षे विशीं धोको थारता. तशेंच हाका लागून सायबर गुन्यांवगारीचो धोकोय निर्माण जाता. हाका लागून सरकार एक समिती नेमपाचो विचार करता. हातूंत शिक्षक, पालक तशेंच ह्या वाठारांतले हेर भागधारक आसतले. ही समिती ह्या विशयाचेर अहवाल सादर करतले. उपरांत आमी केंद्रा कडेन उलयतले, अशें तांणी म्हणलें.
संवसारीक पांवड्यार कांय देशांनी अशी बंदी हाडल्या. आमकां विकसीत भारताचें सपन पुराय करपा खातीर बरे तरणाटे निर्माण करप गरजेचें. हाका लागून अशा गजालींचेर लक्ष दवरप गरजेचें. सध्या बंदी विशीं मुळाव्या पांवड्यार काम सुरू आसा. बंदी खंयच्या प्लॅटफाॅर्माचेर हाडची, कशी हाडची हे विशीं शिक्षण, समाजीक आनी हेर लोकांचे विचार लक्षांत घेतात, अशें मत्री खंवटे हांणी म्हणलें.
महाविद्यालयांत जाल्ले कन्व्हर्ज ३.० हे कार्यावळींत तांणी बदलपी तंत्रज्ञान आनी मनशान एकठांय काम करप गरजेचें आशिल्ल्याचें तांणी सांगलें. विद्यार्थ्यांनी संदीचो योग्य वापर करून ज्ञाना सयत कुशळटाय विकसीत करपाचो सल्लो तांणी दिलो. ह्या वेळार डॉ. शाबेर अली, डॉ. रंजना फेरांव, डॉ. नियान मार्चॉन हांणी विद्यार्थ्यांचें मार्गदर्शन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
