भांगरभूंय | प्रतिनिधी
पणजी : गोंयांत फाटल्या कांय दिसांनी ऑनलायन फटवणूक प्रकरणां वाडपाक लागल्यांत. हाचे वरवीं जायत्या जाणांक लाखांनी रुपयांची फटवणूक जाल्या.
फोनाचेर संपर्क सादप आनी नोकरी दिवपाच्या निमतान ऑनलायन पयशे धाडपाक सांगप, वाहन दिवपा खातीर यूपीआय वरवीं पयशे धाडपाक सांगप, मॅट्रि्मॉनियल सायटीवेल्यान इश्टागत करून तोपी घालप, ई येरादारी चलना वरवीं फटींगपणां करप, अशे तरेच्यो विवीध पद्धती वापरून खुबश्या जाणाच्या कश्टांचे लाखांनी रुपया लुटल्यात.
फाटल्या कांय दिसां सावन फटींगपणाच्यो जाल्ल्यो घडणुको सकयल दिल्ले प्रमाण आसात. ऑनलायन, सायबर वेव्हार करतना कितलें शिटूक वागपाची गरज आसा हें ह्यो घडणुको दाखोवन दितात.
ऑनलायन ‘मॅट्रि्मोनियल फटींगपणान वगडायले १.३९ लाख
ऑनलायन ‘मॅट्रिमोनियल’ फटींगपणाच्या जाळ्यांत आडकून इंदिरा नगर, चिंबलाचे एके तरणाटेन १.३९ लाख रुपया वगडायले. ‘मॅट्रिमोनियल’ सायटीवेल्यान तरणाटी एका तरणाट्याच्या संपर्कांत आयली. उपरांत ताचे कडेन इश्टागत वाडटांच त्या तरणाट्यान तिका म्हारग सामान धाडटां अशें सांगलें. उपरांत ते तरणाटेक फोन येवपाक लागले आनी कॉरियर एजंट आनी कस्टम अधिकारी उलयतां अशें सांगून पार्सल धाडपा खातीर ऑनलायन पयशे धाडपाक सांगलें. पयशे धाडूनय मोलादीक सामान येना आनी संपर्क करपाचो नंबरूय बंद येता हें समजतांच तरणाटेन पोरणें गोंय पुलीस स्टेशनांत कागाळ नोंद केली. ह्या प्रकरणांत पुलिसांनी अनवळख्यां आड गुन्यांव नोंद केलो.
वाहनाची पुरवण करपाचें सांगून २.८० लाखांची तोपी
फोंडें पुलीस स्टेशनांत नोंद जाल्ले घडणुकेंत वाहन पुरवण कपाच्या नांवा खाला संपर्क करून २.८० लाख रुपयांची तोपी घातली. एकल्यान पयलीं मोबायल फोनाचेर संपर्क करून मंगळुरूच्यान छत्तीसगडाक माल पावोवपा खातीर वाहन सेवा जाय आशिल्ल्याचें सांगलें. उपरांत अनवळखी मनशान संपर्क करून आपूण चालक आनी ट्रकांची पुरवण करता अशें सांगलें. विवीध फोन नंबरांवेल्यान संपर्क करून, गोड उलोवन विस्वास जिखलो आनी ट्रकाचें भाडें म्हणून २.८० लाख रुपया फोन पेचेर यूपीआयवेल्यान धाडपाक सांगले.
वास्को दोगांक ४.१४ लाख रुपयांक फटयले
वास्को पुलीस स्टेशनांत नोंद जाल्ल्या दोन घडणुकांनी दोगांक ४.१४ लाख रुपया वगडावचे पडले. एकल्यान मोबायल फोनाचेर संपर्क करून बँक अधिकारी आशिल्ल्याचें सांगून मुंडवेल, वास्कोच्या मनशाक एपीके फायल डावनलोड करपाक सांगली. फायल डावनलोड करतांच ताच्या बँक खात्यांतले २.३१ लाख रुपया गेले आनी ताका फटको बसलो. हेर एक घडणुकेंत धाकतळें, वास्कोच्या एका मनशाक अनवळख्यान आरटीओ ई चलनाची एपीके फायल धाडली. फायलींत ताच्या भावाचो फोटो आशिल्ल्यान फायल उगडली. फायल उगडटांच बँक खात्यांतल्यान १.८४ लाख रुपया बँक खात्यांतल्यान उणे जाले.
फोंड्यां नोकरेच्या हांयसान २.१० लाख होगडायले
फोंडें पुलीस स्टेशनांत नोंद जाल्ल्या कागाळीं प्रमाण, दर्श शंकरे ह्या तरणाट्याक ‘बजाज फायनान्स’त नोकरी दिवपाचें हांयस दाखोवन २.११ लाख रुपयांची तोपी घातली. नोकरी डॉट कॉम हे सायटीवेल्यान ताका संपर्क केल्लो. ह्या प्रकरणांत एके बायले आड फोंडें पुलिसांनी गुन्यांव नोंद केला.
अधिकारी आशिल्ल्याचें सांगून ५ जाणां कडल्यान काडले २९.१३ लाख
गोंय राज्य प्रदूशण नियंत्रण मंडळाचो तोतया अधिकारी सूरज पेंडसे हांणी ५ जाणांक फटोवन तांचे कडल्यान वट्ट २९.१३ लाख रुपया काडले. क्लब गोयाच्या धनया कडल्यान १४.२३ लाख रुपया घेतिल्ल्याचें चवकशेंत मुखार आयलें. काणकोणच्या एका वेवसायिकाक ५.०३ लाखांची तोपी घातिल्ल्याचे कागाळी उपरांत सायबर गुन्यांव फांट्यान सुरज पेंडसे हाका पुणे, महाराष्ट्रच्यान अटक केल्ली. ऑनलाईन, सायबर वेव्हार करतना सतर्कता बाळगप गरजेचें आशिल्ल्याचें ह्यो घडणुको दाखयतात.
ऑनलायन, सायबर वेव्हार करतना शिटूक रावचें
मजगतीं, ह्या वाडपी फटींगपणाच्या प्रकरणांचे फाटभूंयेर ऑनलायन, सायबर वेव्हार करतना लोकांनी सतर्कताय बाळगुची. अनवळख्यांच्या फटींगपणांक भुलोन लाखांनी रुपया होगडावचे न्हय, असो उलो पुलिसांनी मारला. म्हत्वाचें म्हळ्यार शिक्षीत तरणाटेय असल्या फटींगपणांनी आडकतात. ही हुस्को करपा सारकी गजाल आशिल्ल्याचें सुत्रांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
