भांगरभूंय | प्रतिनिधी
कदंब येरादारी म्हामंडळचे अध्यक्ष उल्हास तुयेंकार हांची म्हायती
पणजीः सद्या म्हजी बस 2.0 हे येवजणे खातीर खाजगी बस धनयां कडल्यान उणो प्रतिसाद मेळ्ळा. हे येवजणे खाला आतां मेरेन फक्त 36 बशींची नोंद जाल्या. सरकार सबसिडीच्या रुपांत तांकां पयशे दिता. पूण तांचे येणावळींतल्यान एकय रुपया घेना. देखून चडांत चड बस धनयांनी हे येवजणेचो लाव घेवचो, असो उलो कदंब येरादारी म्हामंडळाचे अध्यक्ष आमदार उल्हास तुयेंकार हांणी मारलाे.
‘भांगरभूंय’ कडेन उलयतना तुयेंकार हांणी सांगलें, कदंबा कडेन खूबश्यो बसी उण्यो आसात, बशींची मागणी वाडल्या आनी ह्याच कारणाक लागून खूबश्या रुटांचेर आमकां बसी चलोवंक मेळनात. देखून येरादारी मंत्री गुदिन्हो आनी मुख्यमंत्री डॉ. प्रमोद सावंत हांणी ‘म्हजी बस’ येवजण चालीक लायल्या.
सद्या खाजगी बशींचो धंदो कमी जाला आनी तांकां प्रवाशी कमी मेळटात, देखून आमी ही येवजण चालीक लायल्या. आतां मेरेन सुमार 36 बशींची नोंद जाल्या आनी फुडारांत आनीक बसी हे येवजणेंत आस्पावन घेतले अशें तुयेंकार हांणी सांगलें.
ते सदां भशेन आपल्या रुटार बसी चलयतले आनी दर किमि खातीर रु. 3 ह्या हिशोबान तांकां म्हयन्याक रु. 18 हजार सरकारा कडल्यान सबसिडी मेळटली. नवी बस घेवपा खातीर रु. 10 लाख इतले अनुदान दितले. तशेंच दर वर्सा तांकां रु. 30 हजार विमो भरपा खातीर भत्तो दितले अशी म्हायती तुयेंकार हांणी दिली.
जर कदंब आनी खाजगी बसींचो वेळ एकूच आसा जाल्यार खाजगी बसीक पयलीं प्राधान्य दिवन तो वेळ तांकां बस सोडपा खातीर दितले. जर चडांत चड बस धनी नोंद जाले जाल्यार ज्या रुटार आमची बस वचना थयं फायदो जावन गोंयकारांक 100 टक्के येरादारीची सुविधा मेळटली. हे येवजणे खातीर जाता तितल्या बस धनयांनी नोंद जावचें असो उलो तुयेंकार हांणी मारलाे.
कदंब म्हामंडळ खाजगी बसीच्या कंडक्टराक मशीन दितले आनी मशिनां वरवीं तिकेट दितले. तिकेटीचे पयशे तांचेच कडेन उरतले आनी ह्या पयश्यांचो रिकोर्ड फक्त आमचे कडेन उरतलो. कदंबाची 50 टक्के सु आनी पास सिस्टम हाचे पयशे आमी तांकां उपरांत आस्पावन दितले. तांणी सदचे भशेन तिकेट काडपाची. ते तिकेटींतल्यान येवपी येणवाळीतलो आमकां कांयच वांटो आसचो ना. उरफाटें सबसिडीच्या रुपान तांकां सरकार पयशे दितले तांचे कडल्यान एकय दुडू सरकार घेवचे ना अशे तुयेंकार हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
