भांगरभूंय | प्रतिनिधी
मुंबयचे कंपनीची नेमणूक करपाचो निर्णय
सेवा तशेंच उपकरणांची करतले पळोवणी
नेमान भेट दिवन अहवाल दिवपाचे निर्देश
भांगरभूंय । प्रतिनिधी
पणजी : सरकारी हॉस्पिटलां मदल्यो तरेकवार सेवा, उपकरणा तशेंच एकंदर यंत्रणेंतल्या उणावांचो सोद घेवपा सयत उपाय सुचोवपा खातीर सल्लागाराची नेमणूक जातली. सल्लागार म्हूण मुंबयचे एके कंपनीची नेमणूक करपाचो निर्णय जाला. तशेंच अर्थीक फांट्याचे जोड सचीव सरकारी हॉस्पिटलांक नेमान भेटी दिवन एकंदर अहवाल सरकाराक सादर करतले. सरकारांतल्या गोपां कडल्यान ही म्हायती मेळ्ळ्या.
भलायकी सेवा तशेंच भलायकी सुविधांचो नियाळ घेवपा खातीर मुख्यमंत्री डॉ. प्रमोद सावंत हांणी बुधवारा बसका घेतली. हे बसकेक भलायकी मंत्री विश्वजीत राणे, भौशीक बांदकाम मंत्री दिगंबर कामत, खेळां मंत्री रमेश तवडकार, समाज कल्याण मंत्री सुभाष फळदेसाय, येरादारी मंत्री मॉवीन गुदिन्हो, खात्यांचे सचीव आनी भलायकी खात्याचे अधिकारी हाजीर आशिल्ले. बसकेंत मुखेलपणान दक्षीण गोंयांतल्या हॉस्पिटलांतल्या स्थितींचो नियाळ घेतलो.
मडगांव दक्षीण गोंय जिल्हो हॉस्पिटल हें मुखेल हॉस्पिटल आसा. ते भायर फोंडें उपजिल्हो हॉस्पिटल, चिखली हॉस्पिटल, काणकोण, सांगें, कुडचडें हांगच्या हॉस्पिटलांतल्या स्थितींचो नियाळ घेतलो. दोतोर तशेंच वैजकी अधिकाऱ्यां खातीर गाडयांची वेवस्था जातली. दरेका हॉस्पिटलांतली स्थिती आनी समस्या त्या, त्या वाठारांतल्या मंत्र्यांनी मांडली. सगल्या हॉस्पिटलांनी दोतोर तशेंच नर्सींचो उणाव आसा. एक्स- रे तशेंच हेर मशिनांची गरज आसा. शस्त्रक्रिया तशेंच हेर सेवां मदीं लेगीत उणाव आसा. फार्मसींनी लेगीत गरजेचीं वखदां उपलब्ध जावपाक जाय. ह्या सगल्यांचो अभ्यास करपा खातीर सल्लागार कंपनीची नेमणूक जातली. सल्लागार कंपनीचे तज्ञ दरेका हॉस्पिटलाक भेट दिवन सेवा तशेंच उपकरणांची पळोवणी करतले. पोरणीं उपकरणां वा मशिनां बदलपाची गरज आसा. दुयेंतींक दोतोरा खातीर वा उपचारा खातीर कितलो वेळ रावचें पडटा, हाचोय नियाळ जातलो. हाचे उपरांत सल्लागार कंपनी सरकाराक अहवाल सादर करतली.
चिखली हॉस्पिटलांत येवपी दुयेंतींचो आंकडो वाडत आसा. दुयेंतींच्या प्रमाणांत दोतोर तशेंच नर्सींचो आंकडो वाडूंक ना. उपकरणांचो लेगीत उणाव आसा, ही गजाल येरादारी मंत्री मॉवीन गुदिन्हो हांणी बसकेंत मांडली.
अपघातांचें प्रमाण वाडत आसा. अपघातांतल्या जखमींचेर बेगीन उपचार जावपा खातीर दरेका हॉस्पिटलांतल्या कॅज्युल्टींनी दोतोर तशेंच नर्सींची संख्या वाडोपाची मागणी मंत्र्यांनी केली. हे भायर अर्थीक फांट्याचे जोड सचीव प्रणव भट्ट हे लेगीत सगल्या हॉस्पिटलांक भेट दिवन सरकाराक अहवाल दितले. थारावीक काळान भेट दिवन अहवाल दिवपाचे निर्देश तांकां आसा. हेर हॉस्पिटलां तशेंच भलायकी केंद्रांनी दोतोर तशेंच सेवांचो उणाव आशिल्ल्यान गोंय वैजकी म्हाविद्यालया वयलो ताण वाडटा. गोंय वैजकी म्हाविद्यालय हॉस्पिटला वयलो ताण उणो जावपा खातीर जिल्हो हॉस्पिटल तशेंच भलायकी केंद्रांनी दोतोर तशेंच सुविधा वाडोवपाची गरज आसा. हाका लागून दक्षीण गोंय जिल्हो हॉस्पिटलांत कंत्राटी पद्दतीचेर दोतोर, सल्लागार तशेंच नर्सींची नेमणूक जातली. तशेंच मडगांव जिल्हो हॉस्पिटला वयलो ताण उणो करपा खातीर फोंडें, कुडचडें, चिखली ह्या हॉस्पिटलांनी सुविधा तयार जातल्यो. सांगें उपजिल्हो हॉस्पिटलाचें काम पुराय जालां. ह्या हॉस्पिटलाचें बेगिनांत बेगीन उक्तावण जातलें. हाचे उपरांत सांगें वाठारांतले दुयेंती मडगांव जिल्हो हॉस्पिटलांत येवपाचें प्रमाण उणें जातलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
