भांगरभूंय | प्रतिनिधी
पणजी :बोरी, फोंडेंच्या सर्कला लागसारच्या आदले सरपंच कोस्टास लुईस हांच्या बंगल्यांत चोरांनी लाखांनी रुपयांचेर मालमत्तेचेर हात मारलो. विशेश म्हळ्यार ह्या म्हालांत एकाच दिसा होरयेची ही तिसरी व्हड घडणूक मुखार आयिल्ल्यान नागरिकां मदीं भंय पातळ्ळा.
हे विशीं मेळिल्ले चड म्हायती प्रमाण, चोरांनी आदल्या सरपंचांच्या बंगल्याच्या मुखेल दाराचें कुलूप मोडून भितर प्रवेश केलो. बंगल्यांत कोणूच नासतना चोरांनी आल्मारींतले सुमार १.३ लाख रुपयांच्यो भांगरा वस्ती आनी २० हजार रुपयांची रोख रक्कम चोरली. फकत भांगरा वस्ती आनी पयशेच न्हय तर चोरांनी बंगल्यांत आशिल्ल्या ६० हजार रुपयांच्यो २० विदेशी सोर्याच्यो बाटल्योय फारयल्यो.
बोरयेचे हे चोरये पयलीं हालींच ढवळी आनी उसगांवां दोन नामनेच्या देवळांनी चोरी जाल्ल्याच्यो घडणुको घडिल्ल्याचें उक्तें जाल्लें. देवळांतले चोरयेची घडणूक ताज्जी आसतनाच चोरांनी आदल्या सरपंचाचो बंगलो फोडिल्ल्यान पुलिसांचे गस्तीचेर आनी सुरक्षीततायेचेर प्रस्न उबो रावला.
हे घडणुकेची म्हायती मेळटांच फोंडें पुलिसांनी बेगोबेग घडणुके सुवातेर पावन पंचनामो केलो. पुलिसांक बंगल्याच्या वाठारांतूच घराचें कुलूप सांपडलें. पुलिसांनी ठसे तज्ज्ञ आनी सुण्यांचे मजतीन पुरावे एकठांय करपाचो यत्न केलो. अनवळखी चोरां आड गुन्यांव नोंद जाला. सीसीटीव्ही फुटेजच्या आधारार तांचो सोद घेवप चालू आसा. हे विशीं पुलीस फुडलो तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
