भांगरभूंय | प्रतिनिधी
हे विशीं कारवाय करपाची रेंट अ कॅब संघटणेची मागणी
पणजीः राज्यांत भायले वेवसायीक खाजगी नंबर प्लॅट आशिल्ल्यो गाडयो रेंट अ कॅब म्हण दित सुटल्यात आनी येरादारी खात्याचे हाचेर कसलेंच नियंत्रण ना. तशेंच कायदेशीर रेंट अ कॅब घेतल्यो जाल्यार कायदे खर जाल्ल्यान पर्यटक खाजगी गाडयो घेतात, असो आरोप रेंट अ कॅब संघटनेन केला.
खाजगी गाडयो भाड्याक दिवपा विशीं कारवाय करपाची मागणी करपा खातीर उत्तर गोंय रेंट अ कॅब संघटनेन येरादारी संचालकाची भेट घेतली. ह्या वेळार संघटणेचे अध्यक्ष रामदास पालकार, सरचिटणीस नितेश चोडणकार आनी हेर वांगडी हजर आसले.
निवेदन भेटयले उपरांत चोडणकार हांणी उलयतना सांगलें, पयलीं आमी खाजगी गाडयो भाड्याक दिताले. उपरांत आमी कांय भुरग्यांनी न्यायालयांत वचून हो धंदो कायदेशीर केला आनी संघटणेची थापणूक करून नीज गोंयकारांक रेंट अ कॅबाचे परमिटां दिलीं.
आमी सगळे कायदेशीर गजालींक जशे की स्पीड गव्हर्नर, वेवसायीक रोड टॅक्स, वेवसायीक विमो धरून गाडी भाड्याक दिता. तशेंच गाडी भाड्याक दिवचे पयलीं पियेवन गाडी चलोवपा, हाडबडीत गाडी चलोवपा विशीं पर्यटकां मदीं जागृताय करून तांचेकडल्यान सगल्यो अटी आनी नेम मान्य करपी फोर्म ५ भरपाक सांगलां. हे कायदेशीर प्रक्रीयेक लागून रेंट अ कॅब कमी जाल्यात आनी खाजगी गाड्यो भाड्याक चलतात, असो आरोप चोडणकार हांणी केलो.
ह्याच खाजगी गाडयांक लागून सोरो पियेवन आनी हाडबडीत गाडी चलोवन अपघात जातात. चडशे ९० टक्के भायले लोक हो बेकायदो धंदो करतात. चडशी होटेला दिल्ली, पंजाब, हरयाणा ह्या भायल्या लोकांनी चलोवपाक घेतल्यात. ते गोंयां नोंद आशिल्ल्यो खाजगी गाडयो २० ते ३० हजार इतले भाडे घेवन पर्यटकांक लुटतात. येरादारी खातें आनी मंत्री खाजगी गाडयांचे गंभीर नात, अशी तिडक चोडणकार हांणी उक्तायली.
जो कायदेशीर धंदो आनी शुल्क भरता तांचेर कायदेशीर कारवाय जातात , मात खाजगी गाडयाचेर कसलीच कारवाय जायना. येरादारी खात्याचे अंमलबजावणी विभागान कळगुंट, वागातोर आनी पणजे येवन पळोवच्यो तांका खाजगी गाडयो भाड्याचेर चलतांना दिश्टी पडटल्यो. मुख्यमंत्र्यान हे गजालीत हस्तक्षेप करपाची मागणी करपा खातीर आमी तांची भेट घेतले, अशें चोडणकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
