भांगरभूंय | प्रतिनिधी
पणजी : चार केंद्रीय कामगार कायदे फाटीं घेवचे, पंचायत आनी हेर कर्मचार्यांक सातवो वेतन आयोग लागू करप, परत परत एम्सा लावचें न्हय अश्या मागण्यां खातीर अखिल भारतीय ट्रेड युनियन कॉंग्रेस वतीन (आयटक) बिरेस्तार आझाद मैदानांत मोर्चा काडलो. ह्या वेळार आयटकान केंद्रीय कामगार संघटणांच्या देशव्यापी संपाक फाटबळ दिलें. हया वेळार ख्रिस्तोफर फोंसेका, सुहास नायक, राजू मंगेशकार, प्रसन्ना उटगी हांचे सयत राज्यभरांतले शेकड्यांनी कामगार हाजीर आशिल्ले.
ह्या वेळार प्रसन्ना उटगी हांणी म्हणलें, केंद्र सरकारान संमत केल्ले चार कामगार कायदे रद्द करपाक जाय. हे कायदे कामगारांच्या हिताचे न्हय. ते कायदे भांडवलदारांच्या फायद्या खातीर तयार केल्यात. राज्यांत हे कायदे लागू जाल्यार कामगारांचें म्हत्व उणें जातलें. हाका लागून कामगारांक हायर अँड फायर करप सोंपें जातलें. ह्या कायद्याक लागून धनी वर्ग कामगारांक गुलामा प्रमाण वागणूक दिवपाची शक्यताय आसा. हे खातीर सरकारन हे कायदे फाटीं घेवपाक जाय.
राज्यांत फार्मा कंपनींतल्यान कामगार संपार वच्चे न्हय हे खातीर सेगीत एम्सा लायतात. हाका लागून कामगारांच्या अधिकारांचेर वेर गेल्ल्यान हो कायदो रद्द करपण गरजेचें, अशें तांणी सांगलें.
पंचायत, गोवा डेअरी आनी हेर कर्मचार्यांकय सातवो वेतन आयोग लागू करप गरजेचें. देशभरांत अकुशळ कामगारांक २६ हजार, जाल्यार कुशळ कामगारांक ३१ हजार ५०० रुपया उण्यात उणें म्हयन्याचें वेतन करप, कंत्राटी पद्धतीन भरती बंद करप, जी रामजी येवजण फाटीं घेवन ताचे सुवातेर आदली मनरेगा सुरू करप, अश्यो मागण्योय आमी केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
