भांगरभूंय | प्रतिनिधी
मडगांव : दक्षीण गोंयां खातीर गरजेचें आशिल्लो दाबोळी विमानतळ राष्ट्रीय सुरक्षेच्या नांवा खाला केंद्र सरकार आनी नौदळ स्वताच्या ताब्यांत घेवपाक पळयता. ह्या विशयांत मंत्री मॉविन गुदिन्हो सामके अपेशी थारल्यात. ते आतां जीएमआरा कडेन बोट दाखयतात. राज्य सरकारान हाचेर सात दिसांनी स्पश्टीकरण दिवचें, ना जाल्यार राज्य पांवड्यावेलें आंदोलन करतले, अशी शिटकावणी आमदार विजय सरदेसाय हांणी दिली.
दक्षीण गोंयच्या पर्यटना सयत हेर वेवसायां खातीर दाबोळी विमानतळ सामको गरजेचो. हे विशीं जानेवारींत विधानसभेंतूय आपणें स्पष्टीकरण मागलां. तेन्ना मंत्री गुदिन्हो आनी राज्य सरकारान दाबोळी विमानतळ प्रवाशां खातीर कायम उरतलें आनी ताचें नुतनीकरण (अपग्रेडेशन) करतले, अशें सांगिल्लें. मात, आतां केंद्रीय मंत्र्यांनी मॉविन हांचे कान उक्ते केल्यात. हाका लागून तांणी मंत्रीपदा सयत आमदारकेचोय राजिनामो दिवचो. दाबोळी हो पुर्तुगेज काळांतलो आनी गोंयची वळख आशिल्लो विमानतळ. आतां दाबोळी विमानतळ वाटोवपा खातीर गोंयकारांनी एकठांय येवपाची गरज आशिल्ल्याचें सरदेसाय हांणी म्हणलें.
ह्यान पयलीं नौदळाच्या एका वरीश्ठ अधिकार्यान केंद्रीय गृहमंत्रालयाक पत्र बरोवन दाबोळी विमानतळ फकत संरक्षणात्मक कार्या खातीर राखून दवरपाची मागणी केल्ली; तो भंय आतां खरो थारता. राष्ट्रीय सुरक्षिततायेच्या नांवा खाला हो डाव रचिल्ल्याचेंय तांणी म्हणलें.
उत्तर गोंयच्या नव्या मोपा विमानतळाक फायदो जावचे खातीर जीएमआर सारकिल्ल्या खाजगी कंपन्यां वतीन दाबोळी विमानतळाचें म्हत्व उणें जाता. दक्षीण गोंयची जनता भाजपा वांगडा रावनाशिल्ल्यान हांगचें पर्यटन, हॉटेल वेवसाय आनी नागरिकांचें हित सरकार पळयना. दाबोळेचे प्रवासी सेवा मुद्दम विस्कळीत केल्ल्यान विमान कंपन्यांचेर स्थलांतरीत जावपा खातीर चेंपण हाडिल्ल्याचो दावो सरदेसाय हांणी केला. तशेंच येवपी वेंचणुकेंत भाजपाच्या सगल्या आमदारांक सत्तेपसून पयस दवरपाची गरज आशिल्ल्याचेंय तांणी नमूद केलें.
दाबोळी विमानतळ बंद जाल्यार दक्षीण गोंयचें पर्यटन, टॅक्सी वेवसाय आनी हॉटेल उद्देगांचेर व्हड संकट येतलें. हो फकत एका विमानतळाचो प्रस्न न्हय, पुराय दक्षीण गोंयच्या अर्थवेवस्थेचा प्रस्न आशिल्ल्याचें सरदेसाय हांणी स्पश्ट केलें. सरकारान दाबोळी विमानतळाच्या फुडारा विशीं आपली भुमिका स्पश्ट करची आनी केंद्र सरकारकडल्यान ‘दाबोळी विमानतळ फुडाराक केन्नाच बंद पडचो ना’ अशें लेखी आस्वासन घेवचें. जर सात दिसांनी सरकारान खर पावलां उबारलीं ना, जाल्यार जनतेक वांगडा घेवन खर राज्य पांवड्यावेलें आंदोलन करतले, अशी शिटकावणी सरदेसाय हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
