भांगरभूंय | प्रतिनिधी
म्हापशें ः सोनारखंड, मार्ना, शिवोले जाल्ल्या स्वयंअपघातांत बिबेक चौधरी (२२, रा. मार्ना, शिवोले आनी मूळ नेपाळ) ह्या तरणाट्याक मरण आयलें. जाल्यार पवन चौधरी (२४) आनी सागर चौधरी (३२) हे दोगूय गंभीर जखमी जाल्यात. त्या दोगांयचेर गोमेकॉंत उपचार चालू आसात.
हे विशीं चड म्हायती प्रमाण, हो अपघात, बिरेस्तार १२ फेब्रुवारीक फांतोडेर सुमार ३ वरांचेर घडलो. मरण आयिल्लो तरणाटो आनी हेर दोगूय जखमी आसगांवच्यान मार्ना शिवोलेचे दिकेन स्कुटरीवेल्यान येताले. सोनारखंड हांगचे देंवतेर पावतांच चालक सागर चौधरी हाचें गाडयेवेल्यान नियंत्रण सुटलें आनी तांणी सुरवातेक रस्त्या कुशीक आशिल्ले राखणे वणटीक आनी थंयच पार्क केल्ले दुचाकीक धपको दिलो.
ह्या अपघातांत दुचाकीचेर फाटल्यान बशिल्लो बिबेक चौधरी आनी जखमी पवन चौधरी आनी चालक सागर चौधरी हे तिगूय जखमी जाले. जखमींक रोखडेच शिवोले भलायकी केंद्रांतल्यान म्हापशें जिल्लो हॉस्पिटलांत दाखल केले. थंय उपचारा वेळार बिबेक हाका मरण आयलें. जाल्यार गंभीर जखमी जाल्लो पवन चौधरी हाका गोमेकॉंत धाडलो. सकाळीं सागर चौधरी हाका गोमेकॉंत फुडल्या उपचारा खातीर धाडलो. थंय ह्या दोगांयचेर उपचार सुरू आसा.
अपघाताची म्हायती मेळटांच हणजूण पुलीस सहाय्यक उपनिरीक्षक जितेंद्र राऊळ हांनी वांगड्यां सयत घडणुके सुवातेर वचून पंचनामो केलो. ताचे पयलींच तिगांय जखमींक हॉस्पिटलांत व्हेल्ले. ह्या प्रकरणांत फुडलो तपास पुलीस उपनिरीक्षक लिशा खर्बे करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
