भांगरभूंय | प्रतिनिधी
पेडणें: आगरवाडां चोपडेंच्या उपसरपंच पदार संगीता गुरुदास नायक हांची विरोधाविणें निवड जाली. हांगा सरपंच पदार शिल्पा सुरज नायक आसा. हीं दोगांय सासूमाय आनी सून. संगीता नायक ही ह्यान पयलीं आगरवाडो चोपडेंची सरपंचूय आशिल्ली. उपसरपंच पदाचे वेंचणुकेंत संगीता नायक हांचो एकूच अर्ज आयिल्ल्यान तांची विरोधाविणें निवड जाल्ल्याचें निर्वाचन अधिकारी ठाकूर हांणी जाहीर केलें.
उपसरपंच पदाची निवड करपाक बसका आपयिल्ली. ह्या वेळार सरपंच शिल्पा नायक, पंच वांगडी संगीता नायक, दिपाली लिंगुडकार, भगिरथ गांवकार, सचिन राऊत, अँथोनी फर्नांडीस, हेमंत चोपडेंकार आनी हेर हाजीर आशिल्ले.
ह्या वेळार उपसरपंच पदा खातीर संगीता नायक हांचो एकूच अर्ज आयिल्लो. हाका लागून तांची उपसरपंच पदा खातीर विरोधाविणें निवड जाली. निर्वाचन अधिकारी म्हणून गटविकास कार्यालयाचे प्रतिनिधी ठाकूर हाजीर आशिल्ले. तांकां पंचायत सचिव करिष्मा मोरजकार हांणी मजत केली.
हे पंचायतींत चार वर्सांत चार सरपंच जाल्यात. ह्यान पयलीं अँथनी फर्नांडीस, सचिन राऊत, हेमंत चोपडेंकार हे सरपंच आशिल्ले. सध्या शिल्पा नायक सरपंच पदार आसात. ताचे पयलीं ती उपसरपंचय आशिल्ली. तशेंच संगीता नायक आतां उपसरपंच जाल्यात. उरिल्ल्या काळांत सरपंचपदार शिल्पा नायक उरतली काय पांचवो सरपंच येतलो तें पळोवपाचें. आगरवाडो गांवांत चार पंच वांगडी आसात, जाल्यार चोपडें गांवांत तीन पंच वांगडी आसात. तातूंत आगरवाड्यावेले पंच अँथनी फर्नांडीस, सचिन राऊत आनी शिल्पा नायक सरपंच जाल्यात. जाल्यार चोपडेंचे पंच हेमंत चोपडेंकार हांकां सरपंच पद मेळ्ळां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
