भांगरभूंय | प्रतिनिधी
फेब्रुवारी सुरू जातकच तरणाट्यांक वेगवेगळे दीस (डे) मनयपाचे वेध लागतात. ते खातीरय ते तयारी करतात. रोझ डे सावन सुरू जाल्लो हो दिसांचो उत्सव व्हॅलेंटायन डे कडेन सोंपता. ह्या वेळार प्रपोज डे, टेडी डे, प्रॉमिस डे, चॉकलेट डे, टेडी डे, हग डे (वेंग मारप), किस डे अशे वेगवेगळे दीस येतात. हो दिसांचो उत्सव सप्तकभर चलता.
खास करून कॉलेजींतले विद्यार्थी हे दीस मनोवपाक मुखार आसतात. कारण हे पिरायेचेर मोग फुलता. आवडटे व्यक्तींक गुलाब दिवन आपली भावना उक्तावपाचें माध्यम म्हणून गुलाब दितात. देखून ह्या दिसांनी गुलाबाची खूब मागणी आसा. ह्या दिसांच्या निमतान लाखांनी रुपयांचो वेपार जाता हें खरें आसलें तरी आमचीं भावनां उक्तावपाक व्हॅलेंटायन डे हो दिसूच कित्याक लागतात? तुमची भावनां उक्तावपाक एक तिरपी नदर आनी तोंडार हांसो पुरो. ते खातीर व्हॅलेंटायन डे चोच म्हूर्त आसपाक जाय, अशें ना.
अशे दीस मनोवचे काय नात हाचेरय मतभेद आसात. म्हज्या मतान आपल्या प्रिय व्यक्तीचो मोग करपाक, तिका भेटवस्तू दिवपाक, खोशी करपाक, अजापीत करपाक, आपली भावनां सांगपाक अमूकच दिसाची गरज ना. बरें, हे दीस पुराण फकत तरणाट्यां खातीरुच आसता अशें न्हय. आयच्या सोशल मिडियाच्या काळांत दिसांचो आंकडो वाडला. व्हॅलेंटायन डे, फ्रेंडशिप डे, फादर्स डे, मदर्स डे, ब्रदर डे, सिस्टर डे, डाॅक्टर डे, वकील डे, इंजिनियर डे अशे कितले दीस
आसात.
सोशल मिडियाचेर सक्रीय आशिल्ल्यां खातीर हे दीस म्हणल्यार एक उत्सवूच. वेगवेगळ्या दिसांची शुभेत्सा दिवपी लोकांच्या पोस्टांचेर लायक्स, कमेंट आनी शेअरांचो पावस पडटा. वर्सभर आवय- बापायचो मोग आनी आदर केन्नाच उक्तायनाशिल्ले मदर्स, फादर्स डेच्या दिसा खूब सक्रीय आसतात. आवय- बापयची याद काडपाक, तांचेर मोग करपाक आदर उक्तावपा खातीर तरणाट्यांचेर असल्यार दिसांची वाट पळोवपाचो वेळ आयला. हे दीस म्हणल्यार नैतिकतेचें अवमूल्यन. खंयचोय दीस मनोवचे पयलीं खरेंच ह्या दिसांची गरज आसा काय, हो प्रस्न दरेकल्यान स्वताक विचारचो? आधुनिकतेच्या नांवान अस्तंतेचें कुड्डें अनुकरण करप म्हणल्यार आमचे मूळ संस्कृताये पसून आनी मुल्यां पसून पयस वचप, हें मात खरें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
