भांगरभूंय | प्रतिनिधी
हेराचो जीव अनवळखी मनशा खातीर म्हत्वाचो नासत, पूण तो मनीस आपणाल्या घरच्यां खातीर शीत- कडी जोडपी वा घर चलोवपी आसूं येता.
मनशाची जीण फकत चार खिणाचें नांव, अशें एका वेळार आयकल्लें पूण सद्याचे स्थितींत ही जीण फकत कांय खिणाचीच जाल्या. संवसाराच्या हुसक्यान वावराक गेल्लो मनीस बरे तरेन परत घरा पावतलो, हाचो हुस्को चड करपा सारकी परिस्थिती उप्रासल्या. दर दिसाक एक तरी मनीस रस्तो अपघाताच्या जाळ्यांत सांपडून जीव सोडटा.
दर दिसाक खंय तरी कोणाचो घराबो दुख्खाचे पावळेन दुकां गळयता. सपनां पुराय करपाच्या सोदीक गेल्ल्या भुरग्याच्या सपनांची वात ताच्या वांगडा सासणाची पालवता. घराब्याच्या विचारांत वावरांत गुल्ल आशिल्ल्या जोडकाराचो स्वास कायमचो बंद जाता. हालीं अपघातांचो आंकडो काळीज चिरून उडोवपा सारको वाडला.
आयचे घटकेक कितें चल्लां म्हणपाचो अदमास घेवप सामकेंच कठीण जालां. केन्ना दुसऱ्यांचे चुकीची ख्यास्त नेणाऱ्यांक भोगची पडटा जाल्यार केन्ना स्वताच्याच घाळपणाक लागून जीव वगडावचो पडटा. रस्त्यांची दशा इबाडिल्यान अनवळखी रस्त्यांचेर अपघाताक सुवात निर्माण जाता. केन्ना केन्ना चालीर आशिल्ले गाडये मुखार येवपी हेडगी सुणीं, गोरवां अपघाताक कारण जातात. वाटसुऱ्यांक लेगीत चलत वचप कठीण जालां. ह्या सगल्या प्रकरणांत केन्ना कोणाचे जिणेचो निमणो दीस आसत हें सांगपाक येना.
हे धर्तरेवेलो एकूच जीव भोव सुदैवी आसा तो म्हणल्यार मनीस. ताका खाशेले बुद्दीचें दान फावो जालां. बरें वायट हांचे मदलो फरक समजून घेवपाचें वरदान लाबलां. कितें केल्यार कितें जांव येता हाचीय जाण ताका बरे तरेन आसता. मनशान मात्सो विचार केल्यार सगल्योच अडचणी पयस करूं येतात, पूण अशे तरेचो विचार फकत कांय जाणच करतात.
रस्त्यान वचपाचो अधिकार दर एकल्याक आसा देखून विचार करूनच गाडी चलोवपाक जाय. हेराचो जीव अनवळखी मनशा खातीर म्हत्वाचो नासत, पूण तो मनीस आपणाल्या घरच्यां खातीर शीत- कडी जोडपी वा घर चलोवपी आसूं येता. अपघातांत आयिल्लें एक मरण, घरांतल्या कितल्याश्याच जाणांचो स्वास आडावन दवरपी थारूं शकता.
आयज ल्हान पिरायेच्या भुरग्यांच्या हातान दुचाकी दितात. एकदां ती चलोवपाक शिकलो म्हणटकच आपलो येदो कोण ना अशें भावनेन परवानो नासतनाच भुरगो ती चलयता. केन्ना केन्ना अश्या तरेच्याय परिस्थितींत भुरगो आपणालो जीव वगडायता. एकदां हातांतल्यान भायर पडटकच परतून खंय हातांत येता? मागीर फाटल्यान कपलार हात दवरून बसप हाचे बगर दुसरो कसलोच पर्याय आसना. ते खातीर परिस्थिती हाता भायर वच्चे पयलींच तिका आळाबंदा हाडपाक जाय.
जिणेचो प्रवास वाडोवचे खातीर गाडयांचो वेग उणो करचो पडटलो. कसलेच तरेचें वेसन करिनासतना शाबुद्दीर रावनच गाडी चलोवची पडटली. मोबायलाचेर लक्ष केंद्रीत करिनासतना रस्त्यार लक्ष दिवचें पडटलें. कसलेच तरेचो ताण, विचार, चिंता तकलेंत घोळयनासतना, मन शांत दवरून आनी सक्रीय रावून गाडी चलोवची पडतली. मुळांत येरादारीच्या नेमां प्रमाण गाडी चलयत जाल्यारच भोव प्रमाणांत अपघाताचो आंकडो उणो जांव येता.
निकिता ना. मडगांवकार
9766072893
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
