भांगरभूंय | प्रतिनिधी
पणजी : मांडवी न्हंयेंत येवपी नव्या कॅसिनोक थळावे विरोध करतात. मात सरकार हाचे कडेन आडनदर करता. फुडल्या दोन दिसांनी बोट येवपाची शक्यताय आसा. बोटीक परवानगी दितले तेन्नाच रस्त्यार देंवून वा उदकांत देंवून कॅसिनोची बोट बंद उडोवपाची शिटकावणी वाल्मिकी नायक हांणी दिली. बुधवारा थळाव्यांनी बंदर कप्तान खात्याच्या अधिकार्यांक भेट दिवन बोटीक न्हंयेंत येवपाची परवानगी दिवचे ना अशी मागणी केली. ह्या वेळार सबिना मार्टिन, हरीश मडकयकार, जॅक सुखिया आनी हेर हाजीर आशिल्ले.
वाल्मिकी नायक हांणी म्हणलें, सरकारान नव्या कॅसिनोक परवानगी दिना अशें म्हणलां. अशें जरी आसलें तरी पोरण्या परवान्याचेर नवी बोट हाडचे ना. पोरणी बोट ल्हान आशिल्ली. नवी येवपी बोट खूबूच व्हड आसा. एका अर्थान हांगची एक बोट गेल्यार ताचे सुवातेर स बोटी येवपा सारकीच गजाल. ह्यान पयलीं आमी पणजे महापालिकेक विरोध करपाची मागणी केल्या. आयज आमी बंदर कप्तानांक मेळून हीच मागणी केल्या. थळाव्यांक गृहीत धरल्यार आमकां आंदोलन करचेंच पडटलें.
हरीश मडकयकार हांणी, रईश मागूश पंचायतीन २८ जानेवारीक बंदर कप्तान खात्याक व्हडले बोटीक परवानगी दिवची न्हय अशें पत्र बरयिल्लें. खात्यान ९ फेब्रुवारीक दिल्ले जापे प्रमाण, बोटीक राज्य सरकारान परवानगी दिल्ल्यान हो विशय खात्याच्या अधिकार क्षेत्रात येना. नवे बोटी विशीं दरेक हात वयर करता. पणजे सयत रईश मागूश, रायबंदर, चोडणाच्या नागरिकांनीय ह्या कॅसिनो बोटीक विरोध करप गरजेचें.
कॅसिनोर नजदर दवरतले
सबिना मार्टिन हांणी, व्हडल्या कॅसीनो बोटीक लागून पणजे समस्या वाडटली. हांगची येरादारी कोयंडी, कोयराचो प्रस्न, गुन्यांव वाडटले. हाका लागून आमी हाका विरोध करतात. फुडल्या कांय दिसांनी न्हंयेंत नवी बोट येवपाची शक्यताय आशिल्ल्यान आमी ताचेर नदर दवरतले. ह्या प्रस्नाचेर आमदार तशेंच मुख्यमंत्र्यांची भेट घेतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
